नेपालगन्ज : बाँके जिल्लामा उपचारको क्रममा बाहिरी जिल्लाबाट आएका एक कोरोना संक्रमितको मृत्यु भएकोछ ।

नेपालगन्ज मेडिकल कलेज शिक्षण अस्पताल कोहलपुरमा उपचाररत दाङ लमही नगरपालिका वडा नम्बर–५ निवासी ५५ वर्षिय पुरुषको निधन भएको हो ।

जिल्ला कोभिड –१९ संकट ब्यवस्थापन केन्द्र बाँकेका अनुसार कोरोना संक्रमित ती पुरुषको उपचारका क्रममा बिहीबार बेलुका ४ बजेर ५० मिनेटमा निधन भएको छ । योसगैं बाँके जिल्लामा उपचारका लागि बाहिरी जिल्लाबाट आएका कोरोना संक्रमित ब्यक्ति १६ जनाको मृत्यु भएको छ ।

गत असोज २७ गते स्वास्थ्यमा समस्या आएपछि कोरोना भाइरस संक्रमणको आशंकामा स्वाब जाँच गरिएको थियो । सोही दिन आएको पीसिआर रिर्पोटमा उनमा कोरोना पोजेटिभ पाइएको केन्द्रले जनाएकोछ ।

कोरोना पोजेटिभ पाइए लगत्तै नेपालगन्ज मेडिकल कलेज शिक्षण अस्पताल कोहलपुरको कोभिड–१९ युनिटमा राखेर रोगको प्रकृती अनुसार अक्सिजन थेरापी, अन्टिबायोटिकसँगै भेन्टिलेटरमा राखेर उपचार गर्दा गर्दै मृत्यु भएको हो ।

पारिवारिक स्रोतका अनुसार मृतक ५५ वर्षिय पुरुष लामो समयदेखि मधुमेह र उच्च रक्तचापबाट ग्रसित थिए ।