नेपालगन्ज : सेवाग्राहीलाई लक्षित गर्दै जिल्ला प्रशासन कार्यालय बाँकेमा अत्याधुनिक सेवाग्राही कक्ष सञ्चालन गरिएको छ ।

विशेषगरी नागरिकता, राहदानी लगायतका सेवा प्रवाह गर्दा हुने भिडभाड नियन्त्रण तथा व्यवस्थापनका लागि उक्त अत्याधुनिक सेवाग्राही कक्ष स्थापना गरिएको हो ।

जिल्ला प्रशासन कार्यालय बाँकेमा सञ्चालनमा ल्याइएको उक्त अत्याधुनिक कक्षको नेपालगन्ज उपमहानगरपालिकाका मेयर डाक्टर धवल शम्शेर राणाले बुधबार एक कार्यक्रमकाबीच उद्घाटन गरे । उद्घाटन गरिएको उक्त कक्षमा टोकन प्रणाली सिस्टम लागु गरिएकोछ ।

उद्घाटन गर्दै मेयर राणाले यसले कार्यालयमा हुने अनावश्यक भिडभाडमा कमी भई छिटो छरीतो र सहज तरिकाले सेवा प्रवाह हुने बताए । यसले सेवाग्राहीलाई मात्र नभइ कर्मचारीलाई समेत सहयोग पुर्याउने उनले बताए ।

सरकारी संरचना र व्यवहारहरु सेवाग्राहीमैत्री नभएको भन्दै शासन प्रकृया जनमैत्री र जनउत्तरदायी बनाउन सेवाग्राहीको सहजताका लागि सेवाग्राही कक्ष सञ्चालनमा ल्याईएको बाँकेका प्रमुख जिल्ला अधिकारी रामबहादुर कुरुम्वाङ्गले जानकारी दिए ।

नेपालगन्ज उपमहानगरपालिकाको २३ वटै वडाबाट एक–एक लाख सहयोग संकलन गरि कुल ३६ लाखको लागतमा उक्त सेवाग्राही कक्ष स्थापना गरिएको हो ।

टोकन प्रणालीमा बास नेपालगन्जले सहयोग गरेको छ भने पिउने पानी सहितको एक सय जना अट्ने क्षमताको उक्त अत्याधुनिक सेवाग्राही कक्ष निर्माण गरिएको छ ।