नेपालगन्ज : नेपालगन्जलाई पूर्ण खोपयुक्त नगर घोषणाका लागि तयारी अघि बढाइएको छ ।

पुर्ण खोप घोषणालाई अन्तिम रुप दिनका लागि खोप तथा सरसफाई प्रबद्र्धन कार्यक्रमको समिक्षा, सुक्ष्म योजना अध्यावधिक र खोप समन्वय अभिमुखिकरण बिहिवार सम्पन्न भएको छ ।

कार्यक्रममा जिल्ला समन्वय समिति बाँकेका संयोजक अजय श्रीवास्तवले यहि फागुन भित्र बाँकेलाई पूर्ण खोपयुक्त जिल्ला घोषणा हुन लागेको जानकारी दिए ।
फागुन १० गते भित्र वडा, १५ भित्र पालिका र ३० गतेभित्र स्थानीय तहलाई पुर्ण खोप घोषणा गर्ने उनँको भनाई छ ।

नेपालगन्ज उपमहानगरपालिकाका प्रमुख डाक्टर धवलशम्शेर राणाले नगरमा भौतिक विकासँगै सामाजिक विकासलाई एकसाथ लैजानुपर्ने बताए । उनले कोभिड–१९ को खोप निकट भविष्यमा आउने भएकाले अहिलेदेखि नै मानसिक रुपमा तयारी हुन स्वास्थ्यकर्मीहरुलाई निर्देशन दिए ।

प्रमुख प्रशासकीय अधिकृत ओमबहादुर खड्का, स्वास्थ्य कार्यालयका प्रमुख धिरजंग शाह, जनप्रतिनिधी तथा स्वास्थ्यकर्मी सहभागी कार्यक्रममा उपमहानगरपालिकाका स्वास्थ्य शाखा प्रमुख रामबहादुर चन्दले नगरलाई पूर्ण खोप घोषणाका लागि सबै पक्षको साथ र सहयोगको आवश्यकता भएको बताए ।

वडा नम्बर १४ का वडाध्यक्ष ओमकारनाथ मिश्राले नगरमा स्वास्थ्य क्षेत्रको सुधारका लागि आवश्यकता अनुसार दरबन्दी हुनुपर्नेमा जोड दिए ।