नेपालगन्ज २४ माघ : कोरोना संक्रमणबाट बाँकेकी थप एक महिलाको मृत्यु भएको छ । बाँकेको कोहलपुर नगरपालिका वडा नम्बर– ११ की ६८ वर्षीया महिलाको मृत्यु भएको हो ।

भेरी अस्पताल नेपालगन्जमा उपचाररत ती महिलाको मृत्यु भएको जिल्ला कोभिड –१९ संकट व्यवस्थापन केन्द्र बाँकेले जनाएकोछ ।

माघ १४ गते कोरोना रिपोर्ट पोजेटिभ आएको ती महिलालाई सोही दिन साँझ साढे ५ बजे अस्पताल भर्ना गरिएको थियो ।

रोगको प्रकृतिअनुसार सबै किसिमको उपचार गर्दासमेत उनको स्वास्थ्य बिग्रिँदै गएपछि शनिवार अपरान्ह ४ बजेर १८ मिनेटमा मृत्यु भएको जिल्ला कोभिड–१९ संकट व्यवस्थापन केन्द्र बाँकेका फोकल पर्सन तेज ओलीले जानकारी दिए ।

योसँगै कोरोना संक्रमणबाट बाँकेमा ज्यान गुमाउनेको संख्या ५४ पुगेको छ ।