नेपालगन्ज ६ फागुन : सरकारले कोरोना भाइरस विरुद्धको थप खोप दुई साता भित्र नेपाल ल्याउने तयारीमा जुटेकोछ ।

स्वास्थ्य तथा जनसंख्या मन्त्री हृदयेश त्रिपाठीले भारतसँग खरिद गर्न लागिएको कोरोना विरुद्धको खोप दुई साताभित्र नेपाल आइपुग्ने बताएका हुन् ।

स्वास्थ्य मन्त्रालयमा आयोजित पत्रकार सम्मेलनमा मन्त्री त्रिपाठीले खोप खरिदका लागि आवश्यक प्रक्रिया अगाडि बढीसकेकाले अबको २ साताभित्र खोप नेपाल आइपुग्ने जानकारी दिए ।

उनका अनुसार खोप खरिदका लागि भारतको सेरम इन्स्टिच्युटलाई सरकारले अग्रिम रकम समेत बुझाइसकेको छ ।

स्वास्थ्य मन्त्रालयले सेरमले उत्पादन गरेको कोभिसिल्ड खोप २० लाख डोज खरिद गर्न लागेको हो ।

खोप नेपाल आएपछि फागुन २३ गतेबाट दोस्रो चरणको खोप अभियान शुरु हुनेछ । यो चरणमा ६० वर्ष माथिकालाई खोप दिइने सरकारको तयारी छ ।

पहिलो चरणमा सञ्चालित खोप अभियानमा गण्डकी र लुम्बिनी प्रदेशमा उत्साहप्रद सहभागिता रहेको मन्त्रालयले जनाएकोछ ।