नेपालगन्ज ७ फागुन: भेरी अस्पताल नेपालगन्जले पहिलो पटक आँखा उपचारको सेवा शुरु गरेकोछ ।

यसअघि आँखा उपचारका लागि फुल्टेक्रा आँखा अस्पताल लगायत निजी क्षेत्रबाट खोलिएका आँखा अस्पतालमा जाने गरिन्थ्यो । भेरी अस्पताल आएका विरामीमा आँखा सम्बन्धि समस्या देखिए ती अस्पताल गइ स्वास्थ्य सेवा लिने गरिएपनि यसले सेवाग्राहीलाई झन्झट हुने गरेको थियो । तर, भेरी अस्पताल नेपालगन्जमा आँखा उपचारको सेवा शुरु भएसंगै यो समस्या हटेर गएकोछ ।

भेरी अस्पताल नेपालगन्जका मेडिकल सुपरिटेण्डेण्ड डाक्टर प्रकाश थापाले छिट्टै शल्यक्रिया सेवा समेत सञ्चालन गर्ने गरी हाल बहिरङ्ग सेवा मात्रै शुरु गरिएको जानकारी दिए । भेरी अस्पताल विकास समितिका अध्यक्ष प्रमोद धितालले शुक्रबार एक कार्यक्रमकाबीच आँखा उपचार सेवाको शुभारम्भ गरेका हुन् ।