नेपालगन्ज २९ चैत : भारतको महाराष्ट्रबाट आएका बाँके खजुराका एक युवालाई कोरोना पुष्टि भएको छ ।

जिल्ला कोभिड–१९ संकट व्यवस्थापन केन्द्र, बाँकेका फोकलपर्सन तेजबहादुर ओलीका अनुसार भारतबाट आएका खजुरा गाउँपालिका वडा नम्बर– ४ का २७ वर्षीय पुरुषमा कोरोना पुष्टि भएको हो ।

भारतको महाराष्ट्र, गुजरातलगायत ठाउँबाट आएका नेपालीको नेपालगञ्ज नाकामा कोरोना जाँच हुने गरेको छ । यो नाकामा चैत्र महिनामा भारताट आएका ११ जनालाई कोरोना पुष्टि भइसकेको छ ।

कोरोना पुष्टि भएकाहरुलाई भेरी अस्पताल नेपालगन्जमा राख्ने गरिएको छ । भारतबाट आएकोलाई मात्रै होइन, बाँकेमै पनि दैनिकजसो नै कोरोना संक्रमित देखापरिरहेका छन् । चैत्र महिनामा बाँकेमा एक सय ५५ जनामा कोरोना पुष्टि भएको वलीले जानकारी दिए ।

भेरीमा दुल्लुकी ७३ वर्षीया महिलाको मृत्यु

यसैबीच, नेपालगन्जस्थित भेरी अस्पतालमा उपचारत कोरोना संक्रमित एक महिलाको मृत्यु भएको छ ।

दुल्लु नगरपालिका–७ दैलेखकी ७३ वर्षीया महिलाको उपचारका क्रममा शनिवार साँझ ५ः २५ बजे मृत्यु भएको जिल्ला कोभिड–१९ संकट व्यवस्थापन केन्द्रका फोकलपर्सन तेज ओलीले जानकारी दिए ।

उनी केही दिन अघिमात्रै नेपालगन्जमा बस्दै आएकी थिइन् । नेपालगन्जमा उनको छोरीको घर छ । स्वास्थ्यमा समस्या देखिएपछि उनको यही कोरोना परीक्षण गरिएको थियो । र, रिपोर्ट पोजेटिभ आएको थियो ।