नेपालगन्ज ३ वैशाख : जिल्ला प्रहरी कार्यालय बाँकेका अनुसार हिजोआज भारतबाट दैनिक रुपमा एक हजारदेखी २ हजारको संख्यामा नेपाली नागरिक फर्किने गरेका छन् ।

बाँकेका प्रहरी प्रमुख, प्रहरी उपरीक्षक ओमबहादुर रानाले अचेल दैनिक रुपमा एक हजारदेखि २ हजारको हाराहारीमा नेपाली नागरिक फर्किने गरेको बताए ।

‘भारतमा काम गरेर फर्केका नेपाली नागरिकको संख्या धेरै छ, घर फर्किरहेका नेपाली नागरिकलाई हामीले कसरी रोक्नु र ?’ उनले भने ‘सीमामा एउटा हेल्थ डेक्स राखिएको छ, त्यहाँ अनिवार्य रुपमा स्वास्थ्य जाँच गरिन्छ ।’ सीमा नाकामा सवारी साधनलाई भने आवत–जावतमा रोक लगाइएको रानाले बताए ।

भारतबाट फर्केका ब्यक्तिको चेकजाँचमा कडाई गर्न आफ्नो मातहतका प्रहरीलाई निर्देशन समेत दिइएको उनले बताए ।