नेपालगन्ज ३ वैशाखः भेरी अस्पताल नेपालगन्जका ६ जना स्वास्थ्यकर्मीलाई कोरोना संक्रमण पुष्टि भएकोछ । कोरोना संक्रमित हुने सबैले कोभिडसिल्ड खोप लगाएका छन् ।

भेरी अस्पतालका मेडिकल सुपरिटेण्डेन्ट (मेसु) डाक्टर प्रकाश थापाका अनुसार भेरी अस्पतालको शल्यक्रिया कक्ष, वार्ड र प्रशासनमा कार्यरत ६ जना स्वास्थ्यकर्मीलाई कोरोना पुष्टि भएको हो ।

अस्पतालमा कार्यरत स्वास्थ्यकर्मीलाई संक्रमण देखिएपछि अस्पतालका अन्य स्वास्थ्यकर्मीको पनि पीसिआर परीक्षणका लागि नमुना संकलन गरिएको छ । उक्त नमुना संकलनको रिपोर्ट शनिबारसम्म आउने हुँदा अस्पतालका अन्य स्वास्थ्यकर्मीमा कोरोना फैलिएको छ छैन पत्ता लाग्ने मेसु थापाले बताए ।

आज संक्रमण पुष्टि भएकामध्ये भेरी अस्पतालमा कार्यरत स्वास्थ्यकर्मी जसले कोरोनाको एक डोज र दुई डोज लगाएका थिए उनै स्वास्थ्यकर्मीलाई संक्रमण देखिएको छ । तर, संक्रमित स्वास्थकर्मीको स्वास्थ्यमा जटिलता भने नदेखिएको मेसु डाक्टर थापाले सेतोखरीलाई जानकारी दिए ।

यसपटक पनि संक्रमितमा श्वासप्रश्वासमा समस्या, ज्वरो आउने, जिउ दुख्ने जस्ता पहिलेकै जस्तो लक्षण देखिएकोछ ।