नेपालगन्ज ५ वैशाख : बालबालिकाको स्वास्थ्यप्रति खेलवाड गर्दै बाँकेका निजी विद्यालयले कोचिङ्गका नाममा सादा पोशाकमा विद्यार्थी बोलाएर पढाइरहेकाछन् ।

तीव्र गतिमा फैलिएको कोरोना संक्रमण रोकथामका लागि बिहीबार बसेको जिल्ला कोभिड संकट ब्यवस्थापन केन्द्र (डिसिसिएमसी) बाँकेले आज आईतबारदेखि जिल्लाका सम्पूर्ण शैक्षिक संस्था बन्द गर्ने निर्णय गरेको छ । तर, बाँकेका निजी विद्यालयले बालबालिकाको स्वास्थ्यप्रति खेलवाड गर्दै अधिकांश निजी विद्यालय खुला गरेको पाइएको हो ।

कोरोना भाइरस समुदायमै फैलिसकेको अवस्थामा बाँकेका अधिकांश विद्यालय तथा कलेजका शिक्षक र विद्यार्थी संक्रमित समेत भएकाछन् । ठूलोमात्रामा शिक्षक र विद्यार्थी संक्रमित भइरहेका बेला डिसिसिएमसीले शैक्षिक संस्था बन्द गर्न आग्रह गरिरहँदा त्यसको विरुद्ध निजी विद्यालय सञ्चालनमा आएका हुन् ।

अभिभावकले आईतबार विहान सेतोखरीलाई फोन गरि निजी विद्यालय खुला रहेको र बच्चाहरुलाई कोचिङ्गका नाममा सादा पोशाकमा बोलाएर पढाईरहेको जानकारी दिए ।

नेपालगन्जकी एक अभिभावकले भनिन्–‘बच्चा र हामी अभिभावकलाई समेत विद्यालयले बच्चा पढाउन नपठाए पढाई छुट्ने भन्दै दवाव दिए ।’ विद्यालयबाटै बच्चा पठाउन दवाव आएपछि बाध्य भएर पठाएको ती अभिभावकले सेतोखरीलाई जानकारी दिइन् ।

बाँकेका निजी विद्यालयले सादा पोशाकमा कोचिङ्गका नाममा विद्यार्थी पढाउदैँ गर्दा यसको प्रभावकारि अनुगमन हुन सकेकोछैन । यसअघि डिसिसिएमसिको बैठकले माक्स नलगाउने, माक्स विना ब्यापार गर्नेलाई कारबाही गर्ने बताइरहँदा जिल्लाका निजी विद्यालयले कोचिङ्गका नाममा सादा पोशाकमा विद्यार्थी बोलाएर पढाइरहेको अनुगमन हुन सकेकोछैन ।