नेपालगन्ज ५ वैशाख : नेपालमा एकैदिन एक हजार बढि कोरोना संक्रमित भेटिएकाछन् । स्वास्थ्य तथा जनसंख्या मन्त्रालयको पछिल्लो २४ घण्टाको तथ्यांकका अनुसार नेपालमा थप एक हजार ९६ जनामा कोरोना संक्रमण पुष्टि भएको छ ।

पछिल्लो २४ घण्टामा देशभर ५ हजार ८४ नमुनाको पीसिआर परीक्षण र ६९९ जनाको एन्टिजेन परीक्षण भएको थियो । ती मध्ये पीसिआर विधिबाट १ हजार १५ जना र एन्टिजेन विधिबाट ८१ जनामा कोरोना संक्रमण पुष्टि भएको मन्त्रालयले जनाएकोछ । यो सँगै नेपालमा कुल संक्रमितको संख्या २ लाख ८४ हजार ६ सय ७३ पुगेको छ ।

मन्त्रालयका अनुसार हाल देशभर ६ हजार २९० जना सक्रिया संक्रमित रहेका छन् । जसमध्ये संस्थागत आइसोलेसनमा ५७६ जना र होम आइसोलेसनमा ५ हजार ७१४ जना रहेका छन् । यस्तै देशभर ११६ जना आइसियु र ४६ जना संक्रमित भेन्टिलेटरमा उपचारत छन् ।

पछिल्लो २४ घण्टामा २ सय ६२ जना उपचारपछि डिस्चार्ज भएका छन् । यो सँगै निको हुनेको संख्या २ लाख ७५ हजार ३ सय पुगेको मन्त्रालयले जनाएको छ । यस्तै देशभर ८५ जना क्वारेन्टिनमा रहेका छन् ।

यसबीच पछिल्लो २४ घण्टामा ८ जनाको मृत्यु भएको छ । योसँगै कोरोना संक्रमणबाट मृत्यु हुनेको संख्या ३ हजार ८३ जना पुगेको छ ।