नेपालगन्ज १३ वैशाखः देश कोरोना महामारिको चपेटामा रहेकै बेला दाङमा एकै दिन दुई दिदीबहिनीको झाडापखालाका कारण मृत्यु भएको छ ।

दाङको राजपुर गाउँपालिका वडा नम्बर–६ की ११ वर्षीया रिता र १३ वर्षीया विनिता बुढाको झाडापखलाका कारण एकै दिन मृत्यु भएको हो ।

ईलाका प्रहरी कार्यालय गढवाका अनुसार प्रेम बुढाका दुई छोरीको झाडापखालका कारण एकै दिन मृत्यु भएको जनाएको ।

शनिबार बेलुका स्थानीय खोलाबाट माछा मारी पकाएर खाएपछि उनीहरूलाई पाखाला सुरू भएको थियो । उपचारका क्रममा दुई दिदीबहिनीको मृत्यु भएपछि दिदीबहिनीको शव पोष्टमार्टमको लागि लमही अस्पतालमा राखिएको छ ।

प्रहरीका अनुसार दिदी विनिताको आईतबार बिहान २ बजेतिर र बहिनी रिताको बिहान ६ बजेतिर स्थानीय स्वास्थ्य चौकीमा उपचारका क्रममा मृत्यु भएको थियो ।

राजपुर गाउँपालिका नेपाल–भारत सीमा नाका क्षेत्रमा पर्छ । राजपुर वनजंगलभित्रको विकट ठाउँ रहेकाले त्यहाँबाट लमहीमा उपचारको लागि ल्याउन निकै कठिन छ ।

भारतीय सरकारले स्थानीय निकायको निर्वाचनका कारण आईतबार र सोमबार दुई दिन सीमा सिल गरेकाले दुबैलाई चाहेर पनि भारतका अस्पतालमा उपचारका लागि लैजान नपाइएको बुझिएकोछ ।