नेपालगन्ज १४ वैशाख : भारतमा कोरोना भाइरसका संक्रमण बढेको बढ्यै भएपछि छिमेकी बंगालदेशले भारतसँगको सीमा सिल गरेको छ ।

बंगलादेशी सञ्चारमाध्यमहरूका अनुसार प्रधानमन्त्री कार्यालयको निर्देशनमा सोमबारदेखि १४ दिनका लागि भारतबाट बंगलादेशमा प्रवेश बन्द गरिएको हो ।

नाका सिल भए पनि सामानहरूको ढुवानी भने जारी रहनेछ । बंगलादेशले यसअघि अप्रिल १४ बाट भारतसँगको हवाई सम्पर्क बन्द गरेको थियो ।

पछिल्लो समय भारत कोरोनाको हटस्पट बनेको छ । सोमबार भारतभरि ३ लाख १९ हजार मानिसमा कोरोना संक्रमण भएको थियो भने २ हजार ७ सयले ज्यान गुमाएका थिए ।

यसैबीच, भारतमा बढ्दो कोरोना भाइरस संक्रमणले यतिबेला भारतीय सीमासंग जोडिएका नेपालका जिल्लाहरुमा कोरोना संक्रमितको संख्या बढेको बढै छ ।

भारतका विभिन्न क्षेत्रमा रोजगारी तथा अन्य कामका शिलसिलामा गएका नेपालीहरु धमाधम नेपाल फर्किरहेकाछन् । यसरी नेपाल आउनेमा कोरोना संक्रमण देखिनुका साथै मर्नेको संख्या पनि बढिरहेकोछ । तर, नेपाली सीमानाका बन्द गरिएको छैन ।

नेपाल–भारत सीमानाकाबाट निर्वाधरुपमा सर्वसाधरणहरु आउजाउ गरिरहेकाछन् । यसरी आउनेहरु विहे, दाहसंस्कार, रोजगारी, औषधी उपचार लगायतका बहानामा आउजाउ गरिरहेकाछन् । उनीहरुको आउजाउलाई सीमासुरक्षार्थ तैनाथ सुरक्षाकर्मीले समेत रोक्न सकेकाछैनन् ।