नेपालगन्ज १५ वैशाख : कोरोना भाइरस संक्रमणका कारण बाँकेको नेपालगन्जका थप दुई जनाको मृत्यु भएकोछ ।

जिल्ला कोभिड–१९ संकट व्यवस्थापन केन्द्र (डिसिसिएमसी) बाँकेका अनुसार यसरी ज्यान गुमाउनेमा नेपालगन्ज उपमहानगरपालिका वडा नम्बर १७ र १२ का एक महिला र एक पुरुष रहेकाछन् ।

भेरी अस्पतालमा उपचारका क्रममा नेपालगन्ज–१७ की ३९ वर्षीया महिला र नेपालगन्ज–१२ का ६५ वर्षीय पुरुषको मृत्यु भएको बाँकेका कोरोना फोकल पर्सन तेज ओलीले जानकारी दिए ।

नेपालगन्ज –१७ की ३९ वर्षीया महिलाको वैशाख ८ गते पीसिआर परीक्षण गरिएकोमा त्यसको भोलिपल्ट संक्रमण पुष्टि भएको थियो । उपचारको क्रममा मंगलबार राति १०ः३० बजे उनको मृत्यु भएको हो ।

यस्तै कोरोना संक्रमण भएर वैशाख ६ गते अस्पताल भर्ना भएका नेपालगन्ज –१२ का ६५ वर्षीय पुरुषको उपचारको क्रममा बुधबार बिहान २ः३० बजे मृत्यु भएको फोकल पर्शन ओलीले जानकारी दिए । योसँगै बाँकेमा कोरोना संक्रमणबाट मृत्यु हुनेको संख्या ९९ पुगेको छ । भने बाँकेमा उपचाररत जिल्ला बाहिरका १०८ जनाले ज्यान गुमाएका छन् ।