नेपालगन्ज १५ वैशाख : नेपालगन्ज उप–महानगरपालिकाले रामलिला मैदानस्थित तालिम केन्द्रमा ५० शैय्याको अक्सिजन सहितको आइसोलेसन केन्द्र तयार पारेको छ ।

कार्यबाहक नगरप्रमुख उमा थापा मगरका अनुसार, बिहिवारदेखि कोभिडका विरामीहरुको उपचार सुरु गर्ने गरि आईसोलेसन केन्द्र तयार पारिएको हो ।

भेरी अस्पतालको प्रत्यक्ष निगरानीमा उप–महानगरपालिकाले आइसोलेसन वार्ड सञ्चालन गर्न लागेको कार्यबाहक नगरप्रमुख उमाले जानकारी दिइन ।

बुधबार कार्यबाहक नगरप्रमुख मगर, भेरी अस्पताल नेपालगन्जका प्रमुख डाक्टर प्रकाश थापा, वडा नम्बर–२ का वडा अध्यक्ष सुनील सिंह हमाल र डाक्टर बद्री चापागाईले आईसोलेसन वार्डको अनुगमन गरे ।

अनुगमनपछि डाक्टर थापाले आईसोलेसन वार्ड सुविधा सम्पन्न रहेको भन्दै यसबाट भेरी अस्पतालमा विरामीको चाप कम गर्न समेत सहज हुने बताए ।

भेरी अस्पताल र उप–महानगरपालिकाले तयार गरेको आईसोलेसन वार्ड नजिकै रहेको भन्दै डाक्टर थापाले भेरी अस्पतालबाट चिकित्सकको सहयोग हुने बताए ।

उपमहानगरपालिकाले आइसोलेसन वार्ड सञ्चालन गरेपछि भेरी अस्पतालमा विरामीको चाप कम हुनेछ ।

नेपालगन्ज उप–महानगरपालिकाले सामान्य विरामीका लागि ह्वाईटहाउसमा समेत आइसोलेसन वार्ड सञ्चालन गरिरहेको छ ।

आईसोलेसन वार्ड तयार गरेको उप–महानगरपालिकाले कोरोना परीक्षणका लागि स्वाव सङ्कलन कार्य समेत सुरु गरेको छ ।