नेपालगन्ज १५ वैशाखः कोरोना संक्रमित उपचारमा खटिएका स्वास्थ्यकर्मी नै संक्रमित भएपछि यतिबेला संक्रमितको उपचारमा जटिलता उत्पन्न भएकोछ ।

भेरी अस्पताल र नेपालगन्ज मेडिकल कलेजका स्वास्थ्यकर्मीलाई कोरोना संक्रमण बढेपछि उपचारमा जटिलता उत्पन्न भएको हो । दुवै अस्पतालका १०७ जना स्वास्थ्यकर्मी संक्रमित भएकाछन् ।

हालसम्म भेरी अस्पतालमा कार्यरत ७ जना चिकित्सकसहित स्टाफ नर्स, पारामेडिक्स, हेल्फर गरेर ६५ जनालाई कोरोना संक्रमण भइसकेको छ । भने नेपालगन्ज मेडिकल कलेजमा कार्यरत ८ जना चिकित्सकसहित ४२ जना स्टाफ नर्स लगायतलाई कोरोना संक्रमण भएको छ ।

भेरी अस्पतालका मेडिकल सुपरिटेण्डेन्ट डाक्टर प्रकाश थापाका अनुसार भेरीको इमेरजेन्सीमा कार्यरत ७ जना चिकित्सकसहित कोभिड वार्ड लगायत अन्य वार्डमा कार्यरत कुल ६५ जना स्वास्थ्यकर्मीलाई अहिलेसम्म कोरोना संक्रमण भएको बताए ।

संक्रमित सबै इमेरजेन्सी कक्षका चिकित्सक अहिले होम आईसोलेशनमा बसिरहेका छन् । यस्तै स्टाफ नर्स, पारामेडिक्स, हेल्फरहरु केही अस्पतालमा भर्ना छन्, भने कोही होम आईसोलेशनमा बसिरहेका छन् ।

आफू संक्रमित भएर पनि केही स्टाफ नर्सले कोभिड वार्डका बिरामीको सेवा गरिरहेका छन् । भेरी अस्पतालमा अहिले २ सय बेड क्षमताको कोभिड वार्ड रहेको छ । तर, कोभिड वार्ड भरिएर पनि संक्रमितहरु अन्य वार्डमा बसिरहेका छन् । बुधबार बिहानसम्म अस्पतालमा २ सय १२ जना बिरामी अस्पतालमा रहेकाछन् ।

यसैगरि नेपालगन्ज मेडिकल कलेज शिक्षण अस्पताल कोहलपुरले कोरोना पोजेटिभ भएका स्वास्थ्यकर्मी केहीलाई होम आईसोलेशन र केहीलाई अस्पतालमा भर्ना गरेर उपचार गरिरहेको छ । कोरोना संक्रमण भएर स्वास्थ्य अवस्था गम्भीर भएका स्वास्थ्यकर्मी अस्पतालमै भर्ना भएर उपचार गरिरहेको र सामान्य अवस्थाका स्वास्थ्यकर्मी होम आईसोलेशनमा बसिरहेको अस्पतालले जनाएकोछ ।

मेडिकल कलेजका कुल ४२ जना स्वास्थ्यकर्मी मध्ये ८ जना डाक्टर र बाँकी स्टाफ नर्स, हेल्फर लगायतका स्वास्थ्यकर्मी रहेकाछन् । मेडिकल कलेजमा अहिले ६० जना जति संक्रमित उपचाररत छन् ।

स्वास्थ्यकर्मीमै तीव्ररुपमा कोरोना संक्रमण बढेपछि अन्य संक्रमित बिरामीको गुणस्तरीय उपचार सेवामा जटिलता उत्पन्न भएको अस्पतालले जनाएका छन् ।