सोमबार, वैशाख २७, २०७८   १०:५३:१०

नेपालमा कोरोनाबाट ७ पत्रकारको निधन, ५५० संक्रमित


सेतोखरी   2078-01-21

नेपालगन्ज २१ वैशाख : कोरोना भाइरस संक्रमणको दोस्रो लहरमा परि देशभरका ७ जना पत्रकारको निधन भएकोछ ।

नेपाल पत्रकार महासंघका महासचिव रोशन पुरीले सोमबार जारी गरेको विज्ञप्तीमा संक्रमणको दोस्रो लहरसंगै संक्रमितमध्ये ७ जना पत्रकारको निधन भएको हो ।

महासंघका अनुसार देशभर कोभिड—१९ को सङ्क्रमण पाँच सय ५० जना पत्रकारलाई देखिएको छ । सङ्क्रमितमध्ये २० जना पत्रकारको अस्पतालमा उपचार भइरहेको र तीमध्ये २ पत्रकारको सघन उपचार कक्षमा उपचार भइरहेको छ ।

महासचिव पुरीले कोरोना सङ्क्रमण भई उपचारको आवश्यकता भएका पत्रकारका लागि निःशुल्क उपचारको प्रबन्ध मिलाउन सरकारसंँग माग गरेका छन् ।

विज्ञप्तिमा संवेदनशील घडीमा अनेक कठिनाइ भए पनि कार्यस्थलमा खटिने पत्रकारलाई अझ बढी गम्भीर र सचेत रहन आग्रह गरिएको छ ।

‘कतिपय शाखामा अक्सिजनसहितको आइसोलेशनको व्यवस्था गरिएको छ । यो विषम परिस्थितिमा महासंघले पत्रकारको स्वास्थ्य सुरक्षा तथा पेशागत सुरक्षामा आपत्कालीन टोली नै बनाएर काम गर्न निर्देशन गरेको छ’, विज्ञप्तिमा भनिएको छ, ‘सोहीअनुसार सहभागिता जनाउन सबै प्रदेश समिति र शाखासहित पत्रकारलाई महासंघ अनुरोध गर्दछ ।’

यस्तै महासंघले कोरोना सङ्क्रमणको चुनौतीपूर्ण अवस्थामा कार्यस्थलमा खटिइरहेका पत्रकारका लागि सुलभ तरिकाले पीसिआर परीक्षणलगायत स्वास्थ्य र सुरक्षा सामग्री व्यवस्था गर्न सरकारसँग माग गरेको छ ।