नेपालगन्ज २८ वैशाख : कोभिड–१९ प्रतिकार्यका लागि बास नेपाल, गैसस महासँघ बाँके शाखा र नेपलिज अमेरीकन च्याम्बर अफ कमर्स, डल्लास टेक्ससले संयुक्त रुपमा आज डिसिसिएमसीलाई स्वास्थ्य सामाग्री हस्तान्तरण गरेको छ ।

डिसिसिएमसी बाँकेका संयोजक एवम प्रमुख जिल्ला अधिकारी शिवराम गेलाललाई संस्थाका प्रतिनिधिहरुले जिल्ला प्रशासन कार्यालयमा ५ लाख ८५ हजार बराबरको स्वास्थ्य सामाग्री हस्तान्तरण गरेको हो ।

यसरी हस्तान्तरण गरिएका स्वास्थ्य सामाग्रीमा २० हजार थान मास्क, ५ हजार ग्लोब्स, १ सय वटा स्यानिटाईजर, १ सय २५ सेट पीपिई र ५० वटा अक्सिमिटर रहेका छन् ।

बासका निर्देशक हेमराज भट्टले सञ्चालन गरेको सामाग्री हस्तान्तरण कार्यक्रममा प्रमुख जिल्ला अधिकारी गेलाललाई सहयोग विवरण सहितको पत्र हस्तान्तरण बासका अध्यक्ष रमेश सिटौलाले गरेका थिए ।

यसैगरी अक्सिमिटर हस्तान्तरणमा नेपलिज अमेरीकन च्याम्बर अफ कमर्स, डल्लास टेक्ससका प्रतिनिधि अनु ओली, गैसस महासँघ बाँकेका अध्यक्ष नमस्कार शाह र बासका निर्वतमान अध्यक्ष मन भण्डारीले उक्त स्वास्थ्य सामाग्री संयुक्तरुपमा हस्तान्तरण गरेका थिए ।

सामाग्री ग्रहण पश्चात प्रमुख जिल्ला अधिकारी गेलालले स्वास्थ्य सामाग्री सहयोग गर्ने संस्थाहरुलाई धन्यबाद दिदैं पारदर्शिरुपमा यसको प्रयोग गर्ने बताए ।