नेपालगन्ज ३० वैशाख : बाँकेमा एकैदिन ६२१ जनाले कोरोना संक्रमण जितेका छन् ।

जिल्लाका विभिन्न अस्पताल, आइसोलेसन सेन्टर तथा होम आइसोलेसन रही उपचाररत ६२१ जना संक्रमितले कोरोना जितेका हुन् ।

जिल्ला कोभिड–१९ संकट व्यवस्थापन केन्द्र बाँकेका अनुसार कोरोना जित्नेमा २९१ महिला र ३३० पुरुष रहेकाछन् । योसहित बाँकेमा हालसम्म ४४५५ महिला र ६३९४ जना पुरुष गरि जम्मा १० हजार ८ सय ४९ रहेकोछ ।

केन्द्रका अनुसार बिहीबार यो समाचार तयार पार्दासम्म नेपालगन्ज मेडिकल कलेजमा एक सय जना र बागेश्वरी ल्याबमा एक सय ३५ जना गरि थप २३५ जनामा कोरोना संक्रमण पुष्टी भएको छ । जसमध्ये बाँके जिल्लाको मात्रै एक सय २९ जना रहेकाछन् । भने भेरी अस्पतालको पीसीआर ल्याबको रिर्पोट अझै सार्वजनिक भएको छैन ।

हालसम्म कोरोना भाइरस संक्रमणका कारण बाँकेका मात्रै २१७ र बाँके बाहिरका १६४ जना गरि ३८१ जनाको ज्यान गइसकेकोछ ।