मंगलबार, असार १, २०७८   ०६:५७:०५

नेपालगन्जबाट अक्सिजन आपूर्ति बन्द भएपछि कर्णाली प्रदेश अस्पतालले थप संक्रमित भर्ना नलिने


सेतोखरी   2078-02-01

File Photo

नेपालगन्ज १ जेठ : नेपालगन्जदेखि अक्सिजन आपूर्ति बन्द भएपछि कर्णाली प्रदेश अस्पताल सुर्खेतले थप कोरोनाका विरामी भर्ना नलिने बताएकोछ ।

प्रदेश अस्पतालले शुक्रबार बेलुका एक सूचना जारी गर्दै अक्सिजनको अभाव भएपछि शनिबार(आज) देखि कारोनाका थप नयाँ बिरामी भर्ना लिन नसकिने जनाएको हो ।

नेपालगन्जबाट अक्सिजनको आपूर्ति हुने गरेको र अक्सिजन आउन छाडेका कारण कोरोनाका नयाँ बिरामी अस्पतालले भर्ना लिन नसक्ने प्रदेश अस्पतालका निर्देशक डाक्टर डम्बर खड्काले बताए ।

निर्देशक खड्काद्वारा जारी विज्ञप्तिमा भनिएको छ, ‘नेपालगन्जबाट आउने अक्सिजन यस अस्पतालमा आपूर्ति हुन नसकेका कारण हाल कोभिड–१९ को संक्रमण भई यस अस्पतालमा भर्ना हुन आउने बिरामीलाई भर्ना गर्न नसकिने व्यहोरा जानकारी गराइन्छ ।’

प्रदेश अस्पतालमा अक्सिजन प्लान्ट सञ्चालनमा आए पनि यहाँ रहेको कोरोना संक्रमित बिरामीलाई हाइफ्लो अक्सिजन दिनुपर्ने भएकाले अक्सिजन सिलिण्डर आवश्यक रहेको निर्देशक खड्काले बताए । ‘अक्सिजन प्लान्ट सञ्चालनमा आए पनि हाइफ्लो अक्सिजन दिन सक्दैन, नेपालगन्जबाट अक्सिजन आउन छाडेको छ, जस्ले गर्दा यो स्थिति आयो,’ उनले भने ।

अस्पतालमा दुईवटा अक्सिजन प्लान्ट भए पनि त्यसबाट उत्पादन हुने अक्सिजनले बिरामीलाई थेग्न सक्ने अवस्था छैन । अहिले हाल करिब एक सय सिलिण्डर अक्सिजन उत्पादन हुँदै आएको छ । तर, अस्पतालमा दैनिक तीन सय बढी अक्सिजन आवश्यक पर्छ । हाल अस्पतालमा ९२ जना जटिल प्रकृतिका संक्रमित उपचाररत रहेका छन् ।