मंगलबार, असार १, २०७८   ०५:३५:४७

१० दिन अस्पताल बसेकाको दोस्रो पीसिआर परीक्षण नगरिने


सेतोखरी   2078-02-01

नेपालगन्ज १ जेठ : कोरोना संक्रमित भइ उपचारका लागि अस्पताल बसेकालाई दोस्रो पीसिआर परीक्षण नगरिने भएकोछ ।

प्रदेश २ को सप्तरीमा अब १० दिनसम्म अस्पतालमा बसेर उपचार गरेका संक्रमितको तीन दिनसम्म कुनै लक्षण नदेखिए दोस्रो पटक पीसिआर परीक्षण नगरिने भएको हो ।
प्रमुख जिल्ला अधिकारी, जिल्लाका सबै स्थानीय तहका प्रमुख, जिल्ला समन्वय समितिका संयोजक, सुरक्षा अधिकारी, जिल्ला कोभिड–१९ संकट व्यवस्थापन समितिका पदाधिकारीको शनिबार बसेको बैठकले यस्तो निर्णय गरेको हो ।

बैठकले संघीय सरकारको निर्णय अनुसार १० दिनपछि संक्रमण नसर्ने सम्भावना रहेकाले अस्पतालमा भर्ना भएकालाई १० दिनसम्म उपचार गरेपछि तीन दिनसम्म लक्षण नदेखिएमा होम आइसोलेसनमा पठाउने निर्णय समेत गरेकोछ ।

उनीहरुलाई चिकित्सकको सल्लाह बमोजिम दोस्रो पीसीआर नगरी एक हप्ता होम आइसोलेसनमा बस्ने गरी पठाउने र त्यसको व्यवस्था स्थानीय तहले मिलाउने निर्णय भएको छ । यस्तै, आइसोलेसन र क्वारेन्टिनमा १४ दिनसम्म बसिसकेकालाई दोस्रो पीसिआर नगराइ होम आइसोलेसनमा पठाउने निर्णय पनि बैठकले गरेको छ ।