नेपालगन्ज २ जेठ : कोरोना संक्रमित विरामीका आफन्तसँग अक्सिजन नमाग्न स्वास्थ्य तथा जनसंख्या मन्त्रालयले आग्रह गरेकोछ ।

आईतबारको प्रेस ब्रिफिङ्गमा मन्त्रालयले कोभिड संक्रमणपछि उपचारका लागि अस्पताल भर्ना हुन आउने बिरामीका आफन्तसँग अक्सिजन नमाग्न अस्पतालहरुलाई आग्रह गरेको हो ।

पछिल्लो हप्तादेखि केही निजी अस्पतालले अक्सिजन अभाव भएको भन्दै बिरामीका आफन्तलाई आफैं अक्सिजनको व्यवस्थापन गर्न लगाउने गरेका छन् ।

केही अस्पतालले अक्सिजन आफैं ल्याएर नआए भर्ना भएका बिरामीलाई डिस्चार्ज गरिने भनेर समेत भन्ने गरेको बिरामीका आफन्तहरुले गुनासो गर्दै आएका छन् ।

मन्त्रालयका प्रवक्ता डाक्टर जागेश्वर गौतमले अक्सिजन व्यवस्थापन गर्ने काम अस्पतालको भएकाले बिरामीका आफन्तलाई बोकेर ल्याउन भनेर नभन्न आग्रह गरे ।

मन्त्रालयका प्रवक्ता डाक्टर गौतमले भने, ‘सम्पूर्ण नर्स, चिकित्सक र स्वास्थ्यकर्मीहरुलाई बिरामीका आफन्तलाई अक्सिजन खोजेर ल्याउनुहोस् भन्ने अनुरोध नगर्न स्वास्थ्य तथा जनसंख्या मन्त्रालयका तर्फबाट हार्दिक अनुरोध गर्दछौं ।’