नेपालगन्ज ४ जेठ : कोरोना माहारी नियन्त्रणमा फ्रन्टलाईनमा उभिएर काम गर्दा गर्दै देशभर नेपाल प्रहरीका पाँच सय जनालाई कोरोना संक्रमण भएको छ । यसबीचमा दुईजनाको मृत्यु भएको छ ।

कोरोना संक्रमणको दोस्रो लहरमा सुरक्षासहित स्वास्थ्य क्षेत्रको व्यवस्थापनमा खटिएका प्रहरी नै असुरक्षित बनेका हुन् ।

प्रहरी प्रधान कार्यालयका अनुसार संक्रमित हुनेमा देशमै सबैभन्दा बढी काठमाडौं उपत्यकाकै छन् । पछिल्लो समय प्रहरीले संगठनमा भएको संक्रमणको विवरण सार्वजनिक गरेको छैन ।

यसअघि पहिलो चरणमा कोरोना संक्रमणका कारण देशभर ६ जना प्रहरीले ज्यान गुमाएका थिए । यो सँगै कोभिड–१९ बाट ज्यान गुमाउने प्रहरीको संख्या ८ पुगेको छ ।

यता जिल्ला प्रहरी कार्यालय बाँकेका अनुसार दोस्रो चरणको कोरोना लहरमा बाँकेका ३९ प्रहरी संक्रमित भइसकेकाछन् ।

जिल्ला प्रहरी कार्यालय बाँकेका प्रहरी प्रमुख ओमबहादुर रानाका अनुसार बाँकेमा कार्यरत ३९ जना प्रहरी कोरोनाको चपेटमा परेका हुन् ।

प्रहरी प्रमुख रानाका अनुसार मङ्गलबार दिउँसोसम्म संक्रमित ३९ जनामध्ये २८ जनाले कोरोना जितेकाछन् । भने ३ जना आइसोलेसन सेन्टर र ८ जना होम आइसोलेसनमा बसि स्वास्थ्य लाभ लिइरहेकाछन् ।

सेतोखरीसंग कुरा गर्दै बाँकेका प्रहरी प्रमुख रानाले भने–‘कोरोना भाइरस संक्रमणसंगै देश र जनताको सुरक्षामा खटिएका प्रहरीलाई स्वास्थ्य मापदण्ड पालान गरि सुरक्षितसंग कार्यक्षेत्रमा खटिन निर्देशन दिएकाछौं ।’

‘दोस्रो लहरले सबैलाई आक्रान्त बनाएकोछ । जोकोही संक्रमित भइरहेकाछन् । स्वास्थ्य मापदण्ड पालना गर्दागर्दै जनताका लागि अहोरात्र खट्ने प्रहरी नै असुरक्षित बनेपछि अन्य प्रहरीमा मनोबल समेत घट्न नदिन आफू लागिपरेको छु ।’ एसपी रानाले भने – ‘संक्रमित प्रहरीहरुमा तिव्ररुपमा स्वास्थ्य सुधार भएकोछ । कोरोना जितेर नियमित काम समेत उहाँहरु फर्किसक्नु भएकोछ । कसैलाई पनि जटिल प्रकारको स्वास्थ्य अवस्था आएको छैन ।’