नेपालगन्ज ७ जेठ : कोरोना संक्रमणबाट पूर्व सहायक मन्त्री डाक्टर प्रेमबहादुर शाहीको निधन भएकोछ । शाहीको बिहीबार बेलुका कोठमाडौंको नक्सालबाट शिक्षण अस्पताल लिने क्रममा साढे ६ बजे निधन भएको हो ।

लामो समयदेखि दम रोगबाट पीडित डाक्टर शाहीलाई बैशाख २९ गते त्रिभुवन शिक्षण अस्पतालमा जाँच गराउँदा कोरोना पोजेटिभ पाइएको थियो । कोरोना पोजेटिभ पाइएका शाही होम आइशोलेशनमा बसेका थिए ।

२००१ साल बैशाख ५ गते दैलेख जिल्लाको दुल्लु नगरपालिका वडा नम्बर– १० सातखम्बमा जन्मिएका डाक्टर शाहीको ७७ वर्षको उमेरमा निधन भएको हो । दैलेख जिल्लाको निर्वाचन क्षेत्र नम्बर–२ बाट २०४३ सालमा राष्ट्रिय पञ्चायत सदस्यमा निर्वाचित भई सहायक मन्त्री समेत बनेका थिए डाक्टर शाही ।

डाक्टर शाही त्रिभुवन विश्वविद्यालयबाट विद्यावारिधी उपाधी प्राप्त गरेर सांसदमा निर्वाचित पहिलो नेपाली र दैलेख जिल्लाबाट विद्यावारिधी गर्ने पहिलो व्यक्ति समेत हुन् ।
उनले राजनीतिशास्त्र र व्यवस्थापनमा स्नातकोत्तर गर्नुका साथै २०३८ सालमा अर्थशास्त्रमा विद्यावारिधी उपाधी हाँसिल गरेका थिए ।

डाक्टर शाहीले राजपरिषद्, राष्ट्रिय विकास परिषद्, त्रिवि सभा, आर्थिक तथा पर्यटन समिति, अन्तर्राष्ट्रिय युवा वर्ष राष्ट्रिय समिति नेपालको सदस्य लगायत थुप्रै राष्ट्रिय तथा अन्तर्राष्ट्रिय संघ÷संगठनहरूमा रहेर काम गरेका थिए ।

नेपाल विद्याभूषण र भूकम्प उद्दार पदकबाट समेत विभूषित उनका थुप्रै एकल तथा संयुक्त पुस्तकहरू, प्राज्ञिक लेख रचनाहरू प्रकाशित छन् ।