नेपालगन्ज १० जेठ : बाँकेमा वैशाख ९ गतेदेखि जारी निषेधाज्ञा लम्बाइएकोछ । पहिलो चरणमा बाँकेको नेपालगन्ज उपमहानगरपालिका क्षेत्रमा मात्र जारी निषेधालाई थप सात दिनका लागि बढाइएको हो ।

दोस्रो चरणमा वैशाख १३ गतेदेखि हुँदै जेठ ९ गते पुनः बाँकेमा निषेधाज्ञा कायम गरिएकोछ ।

प्रमुख जिल्ला अधिकारी शिवराम गेलालको अध्यक्षतामा बसेको सुरक्षा समितिको बैठकले निषेधाज्ञालाई सात दिन निरन्तरता दिने निर्णय गरेको हो । प्रजिअ गेलालले आगामी जेठ १७ गते राति १२ बजेसम्म बाँकेमा निषेधाज्ञा जारी रहने बताए ।

जोखिमको अवस्था अझै कायम रहेकाले निषेधाज्ञालाई निरन्तरता दिइएको प्रजिअ गेलालले बताए । बाँकेमा पाँचौँपटक निषेधाज्ञा बढाइएको हो ।

बाँकेमा जारी निषेधाज्ञा समेत कोरोना संक्रमित र यसबाट ज्यान जानेको संख्यामा भने कमी आउन सकेको छैन । यद्यपी पछिल्ला दिनमा बाँकेका कोरोना संक्रमितको मृत्यु र संक्रमणदरमा कमी आएको छ ।

जिल्ला कोभिड–१९ संकट व्यवस्थापन केन्द्र बाँकेका अनुसार यो समाचार तयार पार्दासम्म पछिल्लो २४ घटामा बाँकेका कुनैपनि संक्रमितको मृत्यु भएको छैन । यसअघि हिजो आईतबार पनि बाँकेमा कोरोनाबाट कसैको मृत्यु नभएको केन्द्रले जनाएकोछ ।