नेपालगन्ज १३ जेठ : पछिल्लो २४ घण्टामा देशभर ७ हजार २ सय २६ जना कोरोना भाइरस संक्रमित निको भएकाछन् । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा देशभर ७ हजार २ सय २६ जनाले कोरोना जितेका हुन् ।

मन्त्रालयका अनुसार यही अवधिमा देशभर थप ६ हजार ९३९ जनामा कोरोना भाइरस संक्रमण देखिएको छ ।

पछिल्लो २४ घण्टामा देशभर गरिएको २० हजार ४१४ जनाको पीसिआर र ५७८ जनाको एन्टिजेन परीक्षणका क्रममा ६ हजार ९३९ जनामा संक्रमण पुष्टि भएको मन्त्रालयले जानकारी दिएको छ ।

देशभर हाल एक लाख १६ हजार ४७६ जना सक्रिय संक्रमित रहेका मन्त्रालयले जानकारी दिएको छ । यस्तै, पछिल्लो २४ घण्टामा कोरोना भाइरसको संक्रमणबाट १०६ जनाको मृत्यु भएको मन्त्रालयले जानकारी दिएको छ ।

हालसम्म कोरोना संक्रमणबाट मृत्यु हुनेको संख्या ६ हजार ९५१ पुगेको छ । देशभर एक हजार ९ जना क्वारेन्टिनमा रहेका छन् ।

देशभर हाल २ हजार १ सय २ जना कोरोना संक्रमित अस्पतालको आइसीयू र भेन्टिलेटरमा छन् । १ हजार ६ सय ४५ आइसीयू र ४५७ जना संक्रमित भेन्टिलेटरमा उपचाररत रहेको स्वास्थ्य तथा जनसंख्या मन्त्रालयले जनाएको छ । यसअघि बुधबार २ हजार १ सय ५ जना संक्रमित आइसीयू र भेन्टिलेटरमा थिए ।