नेपालगन्ज १ असार : कोरोना भाइरस संक्रमणका कारण बन्द भएको शैक्षिक संस्था आजबाट खुलेकाछन् ।

देशभरका विद्यालयहरुमा आजबाट नयाँ शैक्षिक शत्र सुरु भएको छ । नयाँ शैक्षिक शत्र अन्तर्गत आजबाट देशभर विद्यार्थी भर्ना अभियान शुरु गर्ने र साउन एक गतेदेखि पढाइ सुरु गर्ने तयारी छ ।

कोभिड–१९ का कारण नियमित नयाँ शैक्षिक शत्र दुई महिनापछि धकेलिएर असार १ गतेदेखि शुरु भएको हो । नयाँ भर्नाका लागि जेठ २५ देखि प्रचार प्रसार गरी असार १ देखि भर्ना अभियान शुरु गर्ने संघीय सरकारको कार्यतालिका बनेको थियो । त्यही कार्यतालिका अनुसार स्थानीय सरकारले महिनाभर भर्ना अभियान सञ्चालन गर्न लागिएको हो ।

यही भर्ना अभियानको समयावधि भित्र विद्यार्थीलाई पाठ्यपुस्तक उपलब्ध गराइसक्नुपर्ने छ । स्थानीय तहहरुले विद्यार्थीको मूल्यांकन नतिजा सार्वजनिक गर्न र भर्ना अभियान सञ्चालन गर्न विद्यालयहरुलाई निर्देशन दिइसकेका छन् ।

कोरोना संक्रमणका कारण अन्य क्षेत्रजस्तै विद्यालयहरु पनि प्रभावित भएपछि शिक्षा मन्त्रालयले नियमावलीलाई संशोधन गरेर शैक्षिक शत्र दुई महिना ढिला गरी सञ्चालन गर्ने निर्णय गरेको थियो । अघिल्ला वर्षहरुमा विद्यालयहरुको शैक्षिक शसत्र वैशाखदेखि सुरु हुने गर्दथ्यो ।

एउटा शैक्षिक शत्रमा न्यूनतम १८० दिन अर्थात् एक हजार घण्टा पढाउनुपर्छ । सामान्यतया सार्वजनिक बिदा, साप्ताहिक बिदाबाहेक करिब दुई सय दिन विद्यालय सञ्चालन हुन्छ ।