नेपालगन्ज २ असार : लगातार वर्षाका कारण देशभर बाढीपहिरोले वितण्डा मच्चाइरहेका बेला थप केही दिन पानी पर्ने मौसविद्ले बताएकाछन् ।

अझै कम्तीमा तीनदिन निरन्तर पानी पर्नेछ तर, मंगलबार र बुधबारको तुलनामा केही कम वर्षा हुनेछ यद्यपी यो प्रक्रिया नरोकिने मौसमविद्को भनाइ छ ।

‘हिजो र आजको तुलनामा भोलि र पर्सी केही कम पानी पर्छ तर रोकिँदैन’, मौसमविद् मीनकुमार अर्याल भन्छन्, ‘तर हिजो र आज जसरी अति भारी वर्षा भयो त्यही अनुपातमा हुँदैन । यद्यपि भोलि पनि गण्डकी, वाग्मती र सुदूरपश्चिम प्रदेशमा भारी वर्षाको सम्भावना छ ।’

अझै चारपाँच दिन पानी पर्ने सम्भावना रहेको उनी बताउँछन् । यद्यपि तीनदिनको मौसमी प्रणाली मात्रै आफूहरुले निश्चित गर्ने बताउँदै पानी कम परे पनि सचेत हुनुपर्ने मौसमविद् अर्याल बताउँछन् ।

ठूलो पानी परेर जमिन गलेकाले सानो पानी परे पनि पहिरो जानसक्ने भएकाले यसबाट सचेत हुनुपर्ने उनको भनाइ छ ।

‘यो वर्ष मनसुन सुरु हुनबित्तिकै अपेक्षा गरेभन्दा ठूलो पानी पर्यो । ठूलो पानी पर्दा जमिन गलेकाले जुनसुकै बेला जमिन चिप्लिन सक्छ’, उनी भन्छन्,‘त्यसैले कमजोर पहाडी भू–भागमा बसोबास गर्ने व्यक्ति सचेत हुनुपर्छ ।’

कमजोर जमिनमा बस्ति छ भने स्थानान्तरण गर्नुपर्नेमा उनको जोड छ । नदी किनारमा रहेका बस्ती केही समयका लागि स्थानान्तरण गर्न उनको सुझाव छ ।

‘पहाडमा ठूलो पानी पर्दा त्यसको असर तराईमा नदी किनारमा देखिन्छ । पहाडमा कुनबेला पानी परिरहेको छ भन्ने थाहा नहुँदा कुन समय नदीमा बाढी आउँछ भन्ने तराईमा थाहा हुँदैन । रातको समयमा बाढी आयो भने तराइको नदीकिनारका बस्तिमा जनधनको ठूलो क्षति हुनसक्छ’, मौसमविद् अर्याल भन्छन्, ‘त्यसैले नदीकिनारमा रहेका बस्ती र कमजोर पहाडका बस्ति केही समयका लागि सुरक्षित स्थानमा स्थानान्तरण गर्नुपर्ने देखिन्छ ।’

स्थानीय निकायले यसमा सहयोग गर्नुपर्नेमा उनी बताउँछन् । अन्यथा ठूलो क्षति हुनसक्नेतर्फ उनी सचेत गराउँछन् । कतिपय नदीमा अलर्ट राखिएको र ती अलर्ट आफैं बज्ने भएकाले त्यसमा ध्यान दिन र त्यसको पहुँच नभए फोन गरेर भए पनि बुझेर सचेत रहन उनको सुझाव छ ।

मौसमविद् अर्यालका अनुसार भोलि (बिहीबार) देशभर सामान्यदेखि पूर्ण बदली रहनेछ । देशका अधिकांश स्थानहरुमा मेघगर्जन र चट्टयाङ्गसहित हल्कादेखि मध्यम वर्षाको सम्भावना रहेको छ । सुदूरपश्चिम प्रदेश, वाग्मती प्रदेश र लुम्बिनी प्रदेशका एकदुई स्थानमा भारी वर्षाको सम्भावना रहेको उनले जानकारी दिए ।

शुक्रबार देशभर सामान्यदेखि पूर्ण बदली रहने छ भने मेघगर्जन/चट्टयाङ्ग सहित हल्का देखि मध्यम वर्षाको सम्भावना रहेको छ । सुदूरपश्चिम प्रदेश, वाग्मती प्रदेश र लुम्बिनी प्रदेशका एकदुई स्थानमा भारी वर्षाको सम्भावना रहेको मौसमविद् अर्यालले जानकारी दिए ।