नेपालगन्ज १३ असार : देशभर थप ३ हजार ७ जनाले कोरोना भाइरस संक्रमण जितेका छन् ।

स्वास्थ्य तथा जनसंख्या मन्त्रालयका अनुसार देशभरका विभिन्न अस्पतालमा उपचाररत तथा होम आइसोलेसनमा रहेका ती संक्रमित संक्रमणमुक्त भएका हुन् ।
यो सँगै नेपालमा कोरोना संक्रमित भई निको हुनेको संख्या पाँच लाख ८४ हजार ३३४ पुगेको छ ।

यस्तै पछिल्लो २४ घण्टामा देशभर थप एक हजार ९२० जनामा कोरोना भाइरस संक्रमण पुष्टि भएको छ ।

मन्त्रालयका अनुसार गत २४ घण्टामा ६ हजार आरटी–पीसीआर र ३ हजार ८३६ जनामा एन्टिजेन परीक्षण गरिएको थियो ।

पीसीआर परीक्षणमा एक हजार ३५३ र एन्टिजेन परीक्षणमा ५६७ जनामा संक्रमण पुष्टि भएको मन्त्रालयले जनाएको छ । यससँगै नेपालमा कोरोना संक्रमित हुनेको संख्या ६ लाख ६५ हजार ७७७ पुगेको छ ।

यसैगरी पछिल्लो २४ घण्टामा थप ३४ जना संक्रमतिको मृत्यु भएको छ । यो सँगै नेपालमा कोरोनाबाट मृत्यु हुनेको संख्या ९ हजार ९ पुगेको छ ।