नेपालगन्ज १४ असार : नेपालगन्ज उप–महानगरपालिकाले लामो समयदेखि तयारी गरिरहेको गल्स कलेज नयाँ शैक्षिक शत्रदेखि शुरु हुने भएको छ ।

नेपालगन्ज उपमहानगरपालिकाका नगर प्रमुख डाक्टर धवल शम्शेर राणा नेतृत्वको टोलीले सम्बन्धन लगायतका विषयमा आईतबार मध्यपश्चिम विश्व विद्यालयका उपकुलपति नन्दबहादुर सिंह लगायतका उच्च पदाधिकारीसँग छलफल गरेर फर्किएको छ ।

मध्यपश्चिम विश्व विद्यालयका उपकुलपतिसँग छलफलपछि नेपालगन्ज फर्किएको टोली सोमबार पनि नगरप्रमुख डाक्टर राणा सहितको छलफलमा छ ।

कलेज सञ्चालनका लागि असार १० गते भएको ९ औं नगरसभाबाट विनियमावली पारित गरिएको शिक्षा शाखा प्रमुख गोर्खबहादुर थापाले जानकारी दिए ।

पहिलो वर्ष बिएससी, सिएसआईटी र विएड कक्षा सञ्चालनका लागि अनुमतिको प्रक्रिया शुरु गर्दै प्रस्तावना तयार पारी सम्बन्धनका लागि केही दिनमै औपचारिक प्रस्ताव विश्व विद्यालयमा पेश गरिने शाखा प्रमुख थापाले बताए ।

नेपालगन्जमा रहेका मधेसी र मुस्लिम समुदायका छात्राहरुका लागि मुख्य लक्षित गरि कलेज स्थापना गर्न लागिएको हो ।

कलेज सञ्चालनका लागि निर्माण भईरहेको भवनको सम्पूर्ण कार्य एक महिनाभित्रै सम्पन्न हुने उप–महानगरपालिकाले जनाएको छ ।

नगर प्रमुख राणाले नेपालगन्जमा कन्या क्याम्पसको आवश्यकता महसुश गरि सुरुवातदेखि नै कलेज स्थापनाको पहल गरिएको र अहिले त्यो पुरा हुने चरणमा पुगेको बताए ।