नेपालगन्ज २९ साउनः कोरोना विरुद्धको खोप कोभिशिल्डको पहिलो डोज लगाएकालाई आजबाट दोस्रो डोज खोप लगाइँदैछ । नेपालगन्ज उपमहानगरपालिकाका अनुसार कोभिशिल्डको पहिलो डोज खोप लगाएका नागरिकलाई दोस्रो खोपको डोज लगाउन लागिएको हो ।

उपमहानगरपालिकाको २३ वटै वडामा एकैपटक कोभिशिल्डको पहिलो खोप लगाएकालाई दोस्रो मात्रा खोप आज र भोली लगाउने उपमहानगरपालिकाले जनाएकोछ ।

उपमहानगरपालिकाका सवै वडामा विहान ११ बजेदेखि कोरोना भाइरस विरुद्धको खोप कोभिशिल्ड खोप लगाएकालाई एस्ट्राजेनका खोप लगाउन सुरु गरिएकोछ ।

सरकारले यसअघि साउन २५ गतेदेखि कोभिसिल्ड खोपको पहिलो मात्रा लगाएका जेष्ठ नागरिकलाई दोस्रो मात्रा खोप लगाउन सुरु गरिसकेकोछ ।

सरकारले जापान र भुटानले एस्ट्राजेनका खोप उपलब्ध गराएपछि कोभिशिल्ड खोपको दोस्रो डोजको पर्खाइमा रहेका बागमती, गण्डकी, लुम्बिनी, कर्णाली र सुदूरपश्चिम प्रदेशका नागरिकलाई यही साउन २५ गतेदेखि खोप अभियान सुरु भएको हो ।

गत फागुन तेस्रो साता ६५ वर्षमाथिका १३ लाख ३८ हजार भन्दा बढी जेष्ठ नागरिकले भारतको सेरम इन्स्टिच्यूटले विकास गरेको कोभिशिल्ड नामक खोपको पहिलो डोज लगाएका थिए ।

स्वास्थ्य तथा जनसंख्या मन्त्रालयले दोस्रो डोज १२ हप्तापछि लगाउनुपर्ने बताएपनि खरिद सम्झौता भएकोमध्ये १० लाख डोज खोप भारतले नदिएपछि उनीहरु दोस्रो डोज लगाउनबाट वञ्चित भएका थिए ।

सरकारले दोस्रो डोज लगाउन बाँकी ६५ वर्ष माथिका करिब १३ लाख ३८ हजार जनालाई खोप दिदैँछ ।