नेपालगन्ज ३ भदौ : बिराट नेपाल मेडिकल ट्रष्ट बिनएमटीले बाँके जिल्लाका १० वटा स्वास्थ्य संस्थाहरुलाई स्वास्थ्य सामाग्रीहरु उपलब्ध गराएको छ ।

कोरोना संक्रमण नियन्त्रणमा सहयोग पुराउने उद्देश्यले ट्रष्टले स्वास्थ्य कार्यालय बाँकेसँग समन्वय गरेर पीपिई सेट, के एन ९५ माक्स, फेससिल इक्जामिनेशन् ग्लब्स, हेण्ड सेनिटाइजर हाइजिन किट र सर्जिकल माक्स लगायतका स्वास्थ्य सामाग्रीहरु उपलब्ध गराएको हो ।

ट्रष्टको क्षेत्रीय कार्यालयका प्रतिनिधि राजेश कुमार यादवले जिल्ला स्वास्थ्य कार्यालय बाँकेका प्रमुख धिरजंग शाहलाई करिब ७ लाख बराबरको स्वास्थ्य सामाग्रीहरु प्रदान गरेका हुन् । ती स्वास्थ्य सामाग्रीहरु लक्ष्मणपुर, बनकटुवा, खजुरा, बनकट्टी, उदयपुर, महादेबपुरी, चिसापानी, कोहलपुर स्वास्थ्य केन्द्रका साथै टिबी नेपाल र जमुनाहा हेल्थ डेक्सलाई बितरण गरिने छ ।

ट्रष्टले नेपालमा क्षयरोग नियन्त्रणको क्षेत्रमा लामो समयदेखि काम गर्दै आएको छ । पछिल्ला दिनहरुमा चुनौतीपुर्ण बन्दै गएको कोरोना संक्रमण नियन्त्रणमा सहयोग पुगोस् भन्ने उद्देश्यले स्वास्थ्य सामाग्रीहरु उपलब्ध गराइएको ट्रष्टका प्रतिनिधि यादवले बताए ।