नेपालगन्ज ४ भदौ : कोरोना भाइरस संक्रमणकाबीच नेपाली मुस्लिम धर्मावलम्बीहरुले धुमधामका साथ ताजिया विर्सजन गरेकाछन् ।

मुस्लिम समुदायमा दुःख प्रकट गरी मनाइने मोहर्रमको अन्तिम दिन शुक्रबार धुधामकासाथ सम्पन्न भएको छ । विश्वब्यापी महामारी बनेको कोरोना भाइरस संक्रमणकाबीच मोर्हरम मनाइएको हो ।

कोरोनाका कारण प्रभावित बनेको यस वर्षको मोर्हरममा मुस्लिम समुदायको उत्साह कम पाइएको थियो । यद्यपी सीमित ब्यक्तिहरुले राखेको ताजिया तथा मुस्लिम समुदायका युवाहरुले प्रदर्शन गरेका विभिन्न कला प्रदर्शन हेर्नका लागि सर्वसाधरणको उल्लेख्य सहभागिता रहेको थियो ।

नेपालगन्ज उपमहानगरपालिकाभित्र मात्रै नभइ जिल्लाका विभिन्न पालिकामा समेत मोर्हरम पर्व मनाइएको छ । कोरोना भाइरस संक्रमण रोकथाम तथा न्यूनिकरणका लागि सरकारले कुनैपनि धार्मिक तथा सांस्कृतिक कार्यक्रम गर्न/गराउन रोक लगाएको थियो ।

कोरोना भाइरस संक्रमणको जोखिमलाई मध्यनजर गर्दै देशभर सभा, समारोह, उत्सव तथा भेला नगर्न निर्देशन जारी गर्दै २५ जना भन्दा बढि भेला भएको पाइएमा कारबाही गर्ने बताएको थियो । तर, कोरोना माहामारीका बीच चाडपर्व मनाउँदै गर्दा स्वास्थ्य सम्बन्धिको सजगता र सुरक्षालाई मध्यनजर नगरिदाँ यसले थप जोखिम ल्याउनसक्ने सम्भावना बढाएकोछ ।

इस्लामी नयाँ वर्ष १४४३ हिजरीको सुरुवातसँगै तामझामका साथ मनाइने मोहर्रम पर्वलाई दस दिनसम्म विभिन्न कार्यक्रमहरू गरि मनाइएको छ ।

यसरी मनाउन थालियो मोर्हरम

ईराकको करबलाको धार्मिक युद्धमा बिभिन्न षड्यन्त्र गरेर हत्या गरिएका ईमाम हुसेन र ईमाम हुसन लगायतको सम्झनामा मोहर्रम मनाइने गरिन्छ । यो दश दिनसम्म मनाउने गरिन्छ ।

हत्या गरिएका तिनै शहिदहरुको सम्झनामा तयार गरिएका बिभिन्न प्रकारका ताजिया नजिकको कर्बलामा लगेर सेलाएपछि मोहर्रमको समापन हुन्छ ।

मोहर्रमका अवसरमा नगरका बिभिन्न स्थानमा ताजिया झकिझकाउका साथ सजाइएको थियो । सजाइएका ताजियाहरुलाई बाजागाजाका साथ ढोल र नगडाका तालमा नगरको परिक्रमा गराईएको थियो ।

ताजिया विर्सजनका क्रममा ईस्लाम धर्मावलम्बीहरुले दुःख प्रकट गर्दै विभिन्न झाँकी तथा गतिविधि समेत गरेका थिए । नगरका बिभिन्न भागको परिक्रमा गरेर फूल्टेक्रा स्थित करबलामा ताजिया विर्सजन गरिएको करबला संरक्षण समितिले जनाएकोछ ।