मंगलबार, असोज ५, २०७८   ०५:२२:४७

सिनेमा हल सञ्चालन गर्न दिने निर्णय


सेतोखरी   2078-05-16

सांकेतिक तस्विर

नेपालगन्ज १६ भदौ : कोरोना भाइरस संक्रमण उकालो लागेपछि बन्द भएको सिनेमा हल पुनः सञ्चालनमा आउने भएकाछन् । गत वैशाख पहिलो साताबाट बन्द रहेका काठमाडौं उपत्यकाका सिनेमा हलहरु भोलि (बुधबार) बाट सञ्चालन गर्न दिने निर्णय भएको छ ।

काठमाडौं, भक्तपुर र ललितपुरका तीन प्रमुख जिल्ला अधिकारीको बैठकले हल सञ्चालन गर्न दिने निर्णय गरेको हो । स्वास्थ्य सुरक्षाका मापदण्ड पालन गरेर चलचित्र घरहरुलाई सञ्चालन गर्न दिने निर्णय भएपछि लगभग पलायनको संघारमा रहेका सिनेमा घरले पुनः आफ्नो ब्यवसायीक यात्रा शुरु गर्ने भएकाछन् ।

यसरी खोलिने सिनेमा हलले स्वास्थ्य मापदण्ड पालना गरेको हुनुपर्छ । उक्त मापदण्ड पालना भए नभएको प्रशासनबाट अनुगमन गरिनेछ । दोस्रो चरणको कोरोना महामारी फैलिएसँग वैशाखको पहिलो साताबाट देशभरका हलहरु बन्द भएका थिए । साढे ४ महिनापछि हलहरु सञ्चालनमा आउन लागेका हुन् ।

प्रशासनले हल खोल्न अनुमति दिए पनि कुनै पनि निर्माताले प्रदर्शन मिति तय नगरेकाले केही समय चलचित्र भवनहरुमा चलचित्रको अभाव रहनेछ ।

यता कोरोना भाइरस संक्रमणले थलिएको सिनेमा हल सञ्चालन हुने भएपछि काठमाण्डौ उपत्यका बाहिरका सिनेमा हलहरु पनि सञ्चालन गर्न अनुमति दनुपर्ने आवाज उठेकोछ । यद्यपी देशभर कोरोना भाइरस संक्रमणको जोखिम र यसको संक्रमण दर भने कायमै रहेकोछ ।