नेपालगन्ज २५ भदौ : देशभर थप एक हजार १४६ जनामा कोरोना संक्रमण पुष्टि भएको छ ।

शुक्रबार स्वास्थ्य तथा जनसंख्या मन्त्रालयले दिएको जानकारी अनुसार देशका विभिन्न प्रयोगशालाहरुमा गरिएको ५ हजार ५४९ जनाको पीसीआर र २ हजार ३६७ जनाको एन्टीजेन गरी १० हजार ९१६ जनामा गरिएको परीक्षणका क्रममा १ हजार १४६ जनामा संक्रमण पुष्टि भएको हो ।

मन्त्रालयका अनुसार गत २४ घण्टामा कोरोना संक्रमणबाट थप २१ जनाको मृत्यु भएको छ भने एक हजार ६६० जना संक्रमणमुक्त भएका छन् ।

नयाँ थपिएकासँगै नेपालमा कोरोना संक्रमितको कुल संख्या ८ लाख ६१ हजार ९५२ पुगेको छ । तीमध्ये ७ लाख ३६ हजार ६६६ जना निको भएका छन्, भने हालसम्म १० हजार ९२४ जनाको मृत्यु भएको छ ।

मन्त्रालयका अनुसार देशभर २७९५८ जना सक्रिय संक्रमित रहेका छन् । सक्रिय संक्रमितमध्ये २६ हजार २९६ जना होम आइसोलेसनमा रहेका छन्, भने एक हजार ६६२ जना संस्थागत आइसोलेसनमा रहेका छन् ।

यस्तै कोरोनाका बिरामीमध्ये ४५८ जनाको आईसीयू र १४५ जनाको भेन्टिलेटरमा उपचार भइरहेको छ ।