नेपालगन्ज १ मंसिर : देशभर थप ४१२ जनामा कोरोना संक्रमण पुष्टि भएकोछ । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा गरिएको १० हजार १०६ पीसीआर र एक हजार ८८७ जनाको एन्टीजेन परीक्षणका क्रममा ४१२ जनामा संक्रमण पुष्टि भएको हो ।

यो सँगै कुल संक्रमितको संख्या ८ लाख १८ हजार ३५ जना पुगेको छ । कुल संक्रमितमध्ये ७ हजार ६३६ जना सक्रिय संक्रमित छन् ।

गत २४ घण्टामा २०२ जना संक्रमित निको भएका छन् । यो सँगै देशभर निको हुनेको संख्या ७ लाख ९८ हजार ९१६ पुगेको छ । उक्त अवधिमा १ जना संक्रमितको मृत्यु भएको मन्त्रालयले जनाएको छ । हालसम्म कोरोना संक्रमणबाट मृत्यु हुनेको संख्या ११ हजार ४८३ पुगेको छ ।

हाल ९९ जना क्वारेन्टिनमा छन् । पछिल्लो २४ घण्टामा एक लाख १ हजार ७६१ जनाले खोप लगाएका छन् ।