नेपालगन्ज २० मंसिर : भेरी अस्पताल नेपालगन्जका अध्यक्ष प्रमोद धितालसहित चार जनालाई पदबाट हटाउनु नपर्ने कारणसहित ७२ घण्टे लिखित स्पष्टीकरण सोधिएकोछ । स्वास्थ्य तथा जनसंख्या मन्त्रालयले भेरी अस्पताल नेपालगन्जको अस्पताल विकास समितिका अध्यक्ष तथा सदस्यहरुलाई उक्त स्पष्टीकरण सोधेको हो ।

सरकार परिवर्तनपछि आफु निकट ब्यक्तिलाई अस्पताल विकास समितिमा ल्याउन मन्त्रालयले अस्पताल विकास समितिका अध्यक्ष प्रमोद धिताल सहित समितीका सदस्यहरु कृष्णप्रसाद श्रेष्ठ, धनिराम ओली र सरस्वती मल्ललाई पदबाट हटाउनु नपर्ने कारणसहितको ७२ घण्टे स्पष्टीकरण सोधेको छ ।

मन्त्रीस्तरको यही मंसिर ७ गतेको निर्णय अनुसार मंसिर १३ गते स्पष्टीकरण सोधिएको हो । यद्यपी यो सूचना बाहिर आउँदासम्म स्पष्टीकरण सोधिएका समितिका अध्यक्षसहितका सदस्यहरुले लिखितरुपमा स्पष्टीकरण नबुझाएको बुझिएकोछ ।

यतिबेला एमालेबाट विभाजित नेकपा एसका नेता विरोध खतिवडा स्वास्थ्य तथा जनसंख्या मन्त्रीमा छन् । अध्यक्ष धिताल र सदस्यहरु श्रेष्ठ र मल्ल नेकपा एमालेका भएपनि ओली भने गठबन्धनको सहयात्री दल नेकपा माओवादी केन्द्रसँग सम्बद्ध छन् ।

कोभिड रोकथाम र नियन्त्रण तथा अस्पताल विकासका लागि अहोरात्र खटिएको टोलीलाई मन्त्रालयले काम, कर्तव्य र अधिकार पुरा गर्न नसकेको भन्दै स्पष्टीकरण सोधेको हो ।

सरकार परिवर्तनलगत्तै राजिनामा दिनुपर्छ भन्ने मानसिकता बनाएका आफुहरुलाई सोधिएको स्पष्टीकरणको भाषाप्रति दुःख लागेको अस्पताल विकास समितिका एक सदस्यले बताए । उनले स्पष्टीकरणको विषयमा पार्टी नेतृत्वसँग परामर्श भइरहेको जानकारी दिए ।

स्वास्थ्य तथा जनसंख्या मन्त्रालयले भेरी अस्पताल विकास समिति बाँकेका अध्यक्ष प्रमोद धितालसहित सदस्यहरु कृष्णप्रसाद श्रेष्ठ, धनिराम ओली र सरस्वती मल्ललाई लेखेको पत्रको ब्यहोरा यस्तो छ ।

मन्त्रालयका उपसचिव प्रकाश अधिकारीद्वारा हस्ताक्षरित पत्रमा लेखिएकोछ :

भेरी अस्पताल विकास समिति (गठन) आदेश, २०७६ को दफा ३(२)(घ) बमोजिम नेपाल सरकार (माननीय मन्त्रीस्तर)को मिति २०७७/४/०६ को निर्णयानुसार तपाई भेरी अस्पताल विकास समितिको अध्यक्ष/सदस्य पदमा मनोनयन गरिएको र गठन आदेश बमोजिम नै अस्पतालको व्यवस्थापन तथा सञ्चालन कार्यलाई प्रभावकारी बनाई सर्वसाधरणलाई गुणस्तरीय स्वास्थ्य सेवा प्रदान गर्ने दायित्व सुम्पिएको विषय अवगत नै छ ।

अस्पतालको सर्वाङ्गीण विकास, गुणस्तरीय सेवा र स्वास्थ्य सेवामा आम नागरिकको सरल एबम सहज पहुँच सुनिश्चित गर्ने गरी समितिलाई सोही गठन आदेशको दफा ७ बमोजिम काम, कर्तब्य र अधिकार स्पष्ट रुपमा तोकिएको नै छ । यद्यपि तपाईको नियुक्ति पश्चात हालसम्म अस्पताल विकास समितिको तर्फबाट भएको कामकारबाहीबाट अस्पतालको क्षमता बृद्धि, सेवा प्रवाहको प्रभावकारिता तथा अस्पताल प्रशासनको व्यवस्थापन र कामकारबाहीमा सहजीकरण हुन नसकेको आम गुनासो प्राप्त हुन आएको सन्दर्भमा तपाईले भेरी अस्पताल विकास समिति (गठा) आदेश, २०७६ को दफा ३ को उपदफा(१० मा उल्लेख भए बमोजिम अस्पताल विकास समिति गठनको उद्देश्य पुरा गर्न सोही गठन आदेशको दफा ७ मा उल्लेखित समितिको काम, कर्तव्य र अधिकार पुरा गर्न नसकेको हुँदा के कति कारणले गठन आदेशको उद्देश्य बमोजिम काम, कारबाही गर्न नसक्नु भएको हो ? अस्पतालको क्षमता विकास सरोकारवालाहरुसंगको समन्वय र आम नागरिकलाई गुणस्तरीय स्वास्थ्य सेवा प्रवाहमा प्भावकारी भूमिका खेल्न नसकेको देखिएकोले तपाईलाई गठन आदेशको दफा ३ को उपदफा(४) बमोजिम पदबाट हटाउनु नपर्ने कारणहरु भए पत्रको मितिले ७२(बहत्तर) घण्टाभित्र लिखित रुपमा आफ्नो स्पष्टिकरण पेश गर्नुहुन नेपाल सरकार (माननीय मन्त्रीस्तर) को मिति २०७८/०८/ ७ को निर्णअनुसार अनुरोध छ ।