नेपालगन्ज २४ माघ : कोरोना भाइरस संक्रमणका कारण बाँके बाहिरका ४४३ जनाको ज्यान गएकोछ ।
जिल्ला कोभिड–१९ संकट व्यवस्थापन केन्द्र बाँकेका अनुसार कोरोना भाइरस संक्रमणको पहिलो लहरदेखी आज सोमबारसम्म ४४३ जनाको ज्यान गएको हो ।
कोरोना संक्रमित भइ बाँकेमा उपचारका लागि आएका जिल्ला बाहिरका संक्रमितको मृत्यु भएको हो । पछिल्लो समयमा मृत्यु हुनेहरुमध्ये अधिकांशले कोरोना विरुद्धको कुनै पनि खोप नलगाएकाहरु छन् ।
यसैबीच, भेरी अस्पतालमा उपचाररत बर्दियाकी एक बृद्धाको मृत्यु भएको छ ।
बर्दिया ठाकुरबाबा नगरपालिका वडा नम्बर–३ की ६५ वर्षीय बृद्धाको गएराती १० बजे मृत्यु भएको जिल्ला कोभिड संकट व्यवस्थापन केन्द्र बाँकेका फोकल पर्सन तेज ओलीले जानकारी दिए ।
यही माघ २२ गते भेरी अस्पतालमा कोरोना परीक्षण गराउँदा पोजिटिभ रिपोर्ट आएकी उनी २२ गते नै कोभिड वार्डमा भर्ना भएकी थिइन् । भेरीको कोभिड वार्डमा उपचाररत ती बृद्धाको स्वास्थ्यमा सुधार नभएपछि मृत्यु भएको हो । योसंगै बाँकेमा उपचाररत बाहिरी जिल्लाका ४४३ जना कोरोना संक्रमितको मृत्यु भएको छ । यस्तै केन्द्रका अनुसार हालसम्म बाँकेका ३४९ जनाको संक्रमितको मृत्यु भइसकेकोछ ।