कोहलपुर ५ चैत्र : कोहलपुर क्षेत्रमा फोहर थुप्रिदैँ गएपछि यतिबेला कोहलपुर नगरपालिकाले यसको दीर्घकालिन ब्यवस्थापनका लागि चासो देखाएकोछ ।

कोहलपुर नगरपालिकामा करिब दुइ सातादेखि फोहोर उठन सकेको छैन । फोहोर उठाउँदै आएको जटायुले बिभिन्न कारण देखाउँदै फोहोर उठाउन छाडेपछि फोहरको थुप्रोले कोहलपुर क्षेत्र दुर्घन्धित र अब्यवस्थित बन्दा नगरबासीले आलोचना गर्दै सामाजिक सञ्जालमा समेत फोहरका फोटोहरु सार्वजनिक गरेका थिए ।

सामाजिक सञ्जालमै कोहलपुर क्षेत्रमा थुप्रिएका फोहरको तस्विरले नगरको परिचय र स्वास्थ्यमा परेको असरबारे ब्यापक आलोचना हुदैँ आएको छ ।

सर्वसाधरणको विरोध र नागरिकको स्वास्थ्यमा गम्भीर नबनेको भन्दै आरोप खेपिरहेको कोहलपुर नगरपालिकाले नगरपालिका भित्र अब्यबस्थित रुपमा थुप्रिएका फोहोरको दीर्घकालिन व्यवस्थापनका लागि भन्दै सरोकारवालहरु बीच छलफल गरेको छ ।

कोहलपुर नगरपालिकाका प्रमुख लुटबहादुर रावतको संयोजकत्वमा भएको सर्बदलिय छलफलमा बिगतमा भएको फोहोर ब्यवस्थापनको जिम्मा पाएको जुटायुको बिषयमा नगरपालिकाबाट भएका सम्झौतामा नगरपालिका चुकेको नगर प्रमुख रातवले स्विकारे ।

जटायुको बदमासीका कारण सिर्जित परिस्थितीलाई पार लगाउन नगरको फोहोर ब्यवस्थापनका लागि दीर्घकालिन समाधान खोजी कदम चाल्ने नगर प्रमुख रावतको भनाई छ ।

सर्बदलिय सर्बपक्षिय छलफलमा कोहलपुर क्षेत्रमा रहेको फाहोरलाई दीर्घकालीन रुपमा समाधानको लागि डम्पिङ्ग क्षेत्र खोज्न सरोकारवाल निकायहरुले जोड दिएको थिए ।

कोहलपुर नगरपालिकाको सरस्वती सामुदायिक वनमा फोहोर ब्यबस्थापन गर्न सकिने उपयुक्त स्थान भएको उक्त छलफलमा बताइएको थियो । यसका लागि बिभिन्न चरणमा सरस्वती सामुदायिक वनसँग छलफल भइरहेको तर, केही कुराहरु मिल्न नसकेको छलफलमा बताइएको थियो ।

फोहोर ब्यबस्थापनको लागि नगरपालिकाले सरस्वती सामुदायिक वनलाई मासिक एक लाखसम्म दिने बताएको छ । आईतबारदेखि नै कोहलपुरमा फोहोर ब्यवस्थापन हुने बताइएको छ ।

छलफलमा नेपाली काँग्रेस, नेकपा एमाले, माओवादी केन्द्र, राष्ट्रिय जनमोर्चा, नेकपा समाजबादी, कोहलपुर उद्योग बाणिज्य संघका अध्यक्ष , ईलाका प्रहरी कार्यालय कोहलपुरका प्रमुख, ईलाका प्रसाशन कार्यालयका प्रतिनिधिहरुको सहभागिता रहेको थियो ।