नेपालगन्ज ६ बैशाख : स्थानीय तहको निर्वाचन हुन अब जम्मा २४ दिन बाँकी छ । निर्वाचन आयोग र सबै राजनीतिक दलका गतिविधि आगामी स्थानीय तह निर्वाचन केन्द्रित बनेको छ ।

राजनीतिक दलका पछिल्ला प्रत्येक बैठक, छलफल, अन्तरक्रिया र भेला निर्वाचनसम्बन्धी विषयमा केन्द्रित छ । भने आयोगले पनि निर्वाचनका लागि आवश्यक सामग्रीको व्यवस्थापन र तालिम प्रशिक्षण पूरा गरेको छ ।

नेपालमा संघीयता लागू भएपछि स्थानीय तहको दोस्रो पटक निर्वाचन हुँदैछ । आगामी बैशाख ३० गते हुने स्थानीय तहको निर्वाचनले कस्तो परिणाम दिनेछ भन्ने कुरामा आम जनताको रुची र चासो उत्तिकै छ ।

त्यसो त यसपटकको निर्वाचनमा आइपुग्दा नेपाली मतदातामा उम्मेदवार चुन्ने विषयमा फरक मत आइसकेकोछ । विशेष गरि आम जनता र दलगत नेताबाट महिला उम्मेदवार बढाउने विषयमा बढि चर्चा चलिरहेकोछ ।

यसअघि भएको स्थानीय तह निर्वाचनलाई समिक्षा गर्दा बाँकेको ८ पालिका र ८१ वडाका लागि महिला उम्मेदवारको कस्तो अवस्था थियो र अब त्यो अवस्था परिर्वतन होला की नहोला भन्ने विषय पनि चर्चामा रहेकोछ ।

जिल्ला निर्वाचन कार्यालय बाँकेले उपलब्ध गराएको गत २०७४ को स्थानीय तह निर्वाचनको तथ्यांकलाई हेर्दा बाँकेमा महिला उम्मेदवार र निर्वाचित महिला उम्मेदवारले औपचारिकता मात्र प्राप्त गरेको देखिन्छ ।

जिल्ला निर्वाचन कार्यालय बाँकेको तथ्यांक अनुसार बाँकेका ८ वटा पालिकाको प्रमुखमा आठैजना पुरुष निर्वाचित भएका थिए । भने उपप्रमुख/उपाध्यक्षमा ८ जना महिला निर्वाचित भएका थिए ।

बाँकेको ८ वटा पालिकाको प्रमुख÷अध्यक्षमा ८ महिला र ७२ पुरुष गरि ८० जनाको उम्मेदवारी रहेको थियो । त्यसैगरि ८ वटा पालिकाको उपप्रमुख/ उपाध्यक्षका लागि ७ पुरुष र ५५ महिला गरि ६२ जनाको उम्मेदवारी रहेको थियो । यी सबै पालिकाको उपप्रमुख र उपाध्यक्ष बाहेक अन्यमा महिला उम्मेदवारले जित्न सकेनन् ।

यस्तै बाँकेको ८ पालिकाका ८१ वटा वडाका लागि ४७४ जना पुरुष र ३५ जना महिला गरि कुल ५०९ जनाले उम्मेदवारी दिएका थिए । जसमा ८१ जना पुरुष वडाअध्यक्ष निर्वाचित बने । ८१ वडामा कुनैपनि महिला उम्मेदवार विजयी हुन सकेनन् । सोबेला संघीय मान्यता प्राप्त दल बाहेक अन्य साना दल र स्वतन्त्र उम्मेदवारबाट वडाअध्यक्षमा महिला उम्मेदवार चुनावी मैदानमा रहेका थिए ।

यस्तै ८ पालिकाका १६२ अन्य वडा सदस्यका लागि ८३० पुरुष र ३७ महिला गरि ८६७ जनाले उम्मेदवारी दिएका थिए । जसमा १५९ पुरुष र ३ जना महिला गरि कुल १६२ जना निर्वाचित भएका थिए ।

यसैगरि दलित वा अल्पसंख्यक सदस्यमा १८ जनाका लागि २६ पुरुष र ४ महिला गरि ३० जनाले उम्मेदवारी दिएका थिए । जसमा ४ पुरुष र २ महिला निर्विरोध भएका थिए । भने ११ पुरुष र १ महिला निर्वाचित भएका थिए । कुल १५ पुरुष र ३ महिला निर्वाचित बने ।

८१ वटा महिला वडा सदस्य र ८१ वटा दलित महिला वडासदस्यका लागि क्रमश ४३२ र ४०० जनाको उम्मेदवारी रहेको थियो । जसमा क्रमश ८१/८१ जना महिला वडा सदस्य र दलित महिला वडासदस्य निर्वाचित बने ।

कुन राजनीतिक दलले कुन पदमा निर्विरोध र निर्वाचित भए ?

नेपाली काँग्रेसले बाँकेको ८ पालिका मध्ये प्रमुखमा २ जना पुरुष, उपप्रमुख ४ जना महिला र ३० वडा अध्यक्ष पुरुष, २६ महिला वडा सदस्य, २७ दलित महिला वडासदस्य, अन्य वडा सदस्यमा १ जना महिला र ५७ जना पुरुष तथा दलित वा अल्पसंख्यक सदस्यमा ३ महिला र २ पुरुष गरि कुल ६१ महिला र ९१ पुरुष विजयी भएका थिए ।

नेकपा एमालेले ८ पालिका मध्ये प्रमुखमा ४ पालिका, ३ उपप्रमुख, २९ वडा अध्यक्ष पुरुष, महिला वडा सदस्य २९, दलित महिला वडा सदस्य २९, अन्य वडा सदस्य १ महिला र ५७ पुरुष, दलित वा अल्पसंख्यक सदस्य ९ पुरुष गरि कुल ६२ महिला र ९६ पुरुष जितेको थियो ।

माओबादी केन्द्रले कुनैपनि पालिकामा प्रमुख/उपप्रमुखमा जित हाँसिल गर्न सकेन । १० वटा वडाअध्यक्ष पुरुष जितेको माओबादीले महिला वडा सदस्य ८, दलित महिला वडा सदस्य ९, अन्य वडा सदस्य १८, दलित वा अल्पसंख्यक सदस्य १ गरि जम्मा १७ महिला र २९ पुरुष जितेको थियो ।

राष्ट्रिय प्रजातन्त्र पार्टीले एक पालिका प्रमुख, ३ वटा वडा अध्यक्ष पुरुष, महिला वडा सदस्य ६, दलित महिला वडा सदस्य ५, अन्य वडा सदस्य १ महिला र १० पुरुष, दलित वा अल्पसंख्यक सस्य गरि १२ महिला र १४ पुरुष जितेको थियो ।

संघीय समाजवादी फोरम, नेपालले एक पालिका प्रमुख, एक उपप्रमुख, ८ वडा अध्यक्ष(पुरुष), महिला वडा सदस्य ११, दलित महिला वडा सदस्य १०, अन्य वडा सदस्य १८, दलित वा अल्पसंख्यक सदस्य ३ गरि २२ महिला र ३० पुरुष जितेको थियो ।

मधेशी जनअधिकार फोरम, नेपाल(लोकतान्त्रिक) ले एक वडा अध्यक्ष(पुरुष), एक महिला वडा सदस्य, दलित महिला वडा सदस्य १, अन्य वडा सदस्य २ गरि जम्मा २ महिला र ३ पुरुष जितेका थिए ।

यसरी २०७४ को स्थानीय तह निर्वाचनलाई हेर्दा बाँकेमा कुल पद संख्या ४३९ मा पुरुष उम्मेदवार २६३ र महिला उम्मेदवार १७६ जना विजयी भए ।

यो तथ्यांकलाई आधार मान्दा बाँकेको निर्वाचनमा पुरुष उम्मेदवार निर्वाचित भएको संख्या ६० प्रतिशत हुन आउँछ भने महिला उम्मेदवार निर्वाचित भएको संख्या ४० प्रतिशत हुन आउँछ ।

थप समाचार

उपप्रमुखहरुको दावी अब प्रमुखमा

बाँकेका स्थानीय तहमा कुन दलको कस्तो अवस्था ?