नेपालगन्ज २७ पुष : नेपालगन्जमा दादुराको प्रकोप दैनिक रुपमा फैलिँदै गएको छ । दैनिक १८ जना बढी संक्रमित फेला परेपछि यतिबेला नेपालगन्जमा दादुरा संक्रमित बालबालिकाकको संख्या ११० पुगेको छ । जसमध्ये एक जनाको मृत्यु भइसकेको छ भने दुई जना उपचाररत छन् ।

दादुरा संक्रमित दुई जना बालबालिकाको उपचारका लागि भेरी अस्पतालमा भर्ना भएकाछन् । यही पुष २५ र २६ गते गरी दुई जना बालबालिकाका अस्पताल भर्ना भएका हुन् । बाँकी बालबालिकाहरु घरमै आइसोलेसनमा रहेको स्वास्थ्य कार्यालय बाँकेले जनाएकोछ ।

विशेषगरि नेपालगन्जको दश वटा वडामा दादुराका संक्रमित फेला परेका छन् । सबैभन्दा धेरै वडा नम्बर– ८ मा २९ जना संक्रमित फेला परेका छन् । वडा नम्बर– ७ मा २८, वडा नम्बर–११ मा २१, वडा नम्बर–५ मा १५ जना संक्रमित भेटिएका छन् । बाँकेको खजुरामा दुई जना संक्रमित भएका छन् ।

स्वास्थ्य कार्यालय बाँकेका खोप सुपरभाइजर नरेश श्रेष्ठका अनुसार फेला परेका दादुरका संक्रमित ५० प्रतिशत बालबालिकाको स्वास्थ्य अवस्थामा सुधार भइसकेको छ ।

कुल बिरामी ११० मध्ये ७० प्रतिशत अर्थात् ७७ जना बालबालिकाले दादुराविरुद्ध खोपको मात्रा पुरा नगरेको पाइएको उनले बताए । दादुरा रुबेला विरुद्धको खोप शिशु जन्मेको ९ र १५ महिना गरी दुई मात्रा लगाउनुपर्दछ । यी बालबालिकाहरुले १३ प्रकारका खोपमध्ये सबै खोप लगाएको तर, दादुरा–रुबेलाविरुद्धको दोस्रो मात्रा भने नलगाएको पाइएको हो ।

‘दादुराको खोपको दुई मात्रा पुरा गर्नुपर्ने हुन्छ । तर, ७० प्रतिशत बालबालिकाको दादुरा रुबेला विरुद्ध खोपको दोस्रो मात्रा पुरा नगरेको पाइयो,’ उनले भने ।

खोपको मात्रा पुरा नहुनुसँगै जनचेतनाको कमी र कुपोषणका कारण पनि दादुरा फैलिएको हुन सक्ने उनको अनुमान छ । जिल्लामा दादुरा किन र कसरी फैलियो भन्ने बारेमा छलफल भइरहेको पनि उनले बताए ।

बिरामीसँग अस्पतालले शुल्क लिएपछि स्वास्थ्यकर्मीले आक्रोश पोख

भेरी अस्पतालमा उपचार भइरहेका बिरामीसँग अस्पतालले शुल्क लिएपछि वडाबाट उपचारका लागि सिफारिस गरी पठाएका स्वास्थ्यकर्मीले आक्रोश पोखेका छन् । निःशुल्क उपचार हुन्छ भन्दै दादुरा संक्रमितको खोजपडतालमा निस्केका स्वास्थ्यकर्मीले अस्पतालले बिरामीसँग पैसा लिइदिएपछि काम गर्न अप्ठेरो भएको बताएका छन् ।

नेपालगन्ज उपमहानगरपालिकाका स्वास्थ्य महाशाखाका जनस्वास्थ्य निरीक्षक जागेश्वर बस्नेतले संक्रमण फैलिएको नेपालगन्जमा संक्रमितलाई भेरी अस्पतालले निःशुल्क उपचार गर्नुपर्नेमा शुल्क लिएर काम गर्न अप्ठेरो पारेको बताए ।

नेपालगन्जमा संक्रमितको संख्या बढ्दै गएपछि दादुराविरुद्धको खोप अभियान चलाइएको छ । संक्रमण देखिएका वडाका ६ महिनादेखि १५ वर्षसम्मका बालबालिकालाई खोप लगाइएको छ ।

खोप नलगाएका बालबालिकाहरु दादुराबाट बढी प्रभावित भएको भेटिएपछि बाँकेमा पुष २२ गतेदेखि दादुरा रुबेला विशेष खोप अभियान सञ्चालन भएको छ । गत पाँच दिनमा त्यहाँ ३ हजार ९३२ जना बालबालिकालाई दादुरा रुबेला विरुद्धको खोप लगाइएको श्रेष्ठले जानकारी दिए ।

बाँके जिल्लालाई पूर्ण खोपयुक्त जिल्ला घोषणा गरिसकेकोछ । पूर्ण खोपयुक्त जिल्लामा दादुरा रोगको प्रकोप बढेपछि स्वास्थ्य मन्त्रालयले पनि नेपालगन्जमा देखिएको दादुराप्रति चासो देखाएको छ । स्वास्थ्य सेवा विभागको टोली नेपालगन्ज आएको छ ।

विद्यालयहरुमा विदा लम्बाइयो

दादुरा–रुबेला फैलिएपछि नेपालगन्जका विद्यालयहरुमा विदा लम्ब्याइएको छ । अत्याधिक चिसो बढेपछि पुस २४, २४ र २६ गते विद्यालयहरुमा विदा दिएको नेपालगन्ज उपमहानगरपालिकाले दादुरा–रुबेला संक्रमण बढ्दै जाँदा थप दुई दिन विदा लम्ब्याएको हो ।

शिक्षा महाशाखा प्रमुख उपसचिव गोर्खबहादुर थापाले आज एक सूचना निकालेर पूर्व निर्धारित परीक्षाहरुलाई असर नपर्ने गरी पुस २८ र २९ गते उपमहानगरपालिकाभित्र सञ्चालित सामुदायिक, संस्थागत र धार्मिक विद्यालयहरुमा सार्वजनिक विदा दिइएको उल्लेख गरेका छन् । पुस २३ गते शनिवार, २७ गते पृथ्वी जयन्ती, पुस ३० गते शनिवार तथा माघ १ र २ गते लुम्बिनी प्रदेश सरकारले माघीको विदा दिने भएकाले नेपालगञ्जका विद्यालय १० दिन बन्द हुने भएका छन् ।

थप समाचार

पूर्ण खोपयुक्त बाँकेमा दादुराको प्रकोप, एक जनाको मृत्यु हुँदा ७८ संक्रमित