साउदी अरबलाई ६ विकेटले हराउँदै नेपाल बन्यो समुह विजेता

एसीसी प्रिमियर कप


सेतोखरी सेतोखरी   बुधबार, वैशाख ५, २०८१
साउदी अरबलाई ६ विकेटले हराउँदै नेपाल बन्यो समुह विजेता

नेपालगन्ज ५ वैशाख : नेपालले एसीसी प्रिमियर कप २०२४ मा समूह ए बाट सबै ४ खेलमा जित निकाल्दै सेमिफाइनलमा पुगेको छ । ओमनमा बुधबार भएको खेलमा साउदी अरबलाई ६ विकेटले हराउँदै अपराजितका साथ नेपाल सेमिफाइनलमा पुगेको हो ।

७४ रनको लक्ष्य पछ्याएको नेपालले ७.२ ओभरमा ४ विकेट गुमाउँदै पूरा ग¥यो । नेपालको जितमा गुलशन झा १९ बलमा २ चौका र २ छक्कासहित ३२ तथा कप्तान रोहित पौडेल ७ बलमा १ चौका र १ छक्कासहित १६ रनमा नट आउट रहे ।

ओपनर कुशल भुर्तेल डक, आसिफ शेख र कुशल मल्ल २–२ रनमा आउट भए । एक समय २.२ ओभरमा १५–३ को अवस्थामा पुगेको नेपाललाई गुलशन झा र दीपेन्द्रसिंह ऐरीले ३३ रनको साझेदारी गरेका थिए । दीपेन्द्र ९ बलमा ३ चौकासहित १७ रनमा आउट भए । साउदीका ईश्ताक अहमदले २, उस्मान नाजिव र वाजी उल हसनले १–१ विकेट लिए ।

त्यसअघि अलअमरेत क्रिकेट ग्राउण्ड–२ मा टस हारेर पहिला ब्याटिङको निम्तो पाएको साउदीले ८ ओभरमा ७ विकेट गुमाउँदै ७३ रन बनाएको थियो । मंगलबार राती वर्षाको कारण मैदान समयमै खेल्न तयार नहुँदा खेल ८–८ ओभरको भएको थियो ।

Kids Festival 2022
kanti aarogya hospital

ओपनर अब्दुल वाहिदले १६ बलमा ३ चौका र ३ छक्कासहित सर्वाधिक ३७ बनाएका थिए । अन्य कुनैपनि साउदीका ब्याटरले दोहोरो अंकमा रन बनाउन सकेनन् । नेपालका करण केसीले २ ओभरमा २१ रन खर्चेर २ विकेट लिए । अभिनाश बोहराले २ ओभरमा १५ रन खर्चेर २ विकेट लिए । प्रतिश जिसी र ललित राजवंशीले १–१ विकेट लिए ।

नेपाल समूह ए बाट नेपालको जितले हङकङ उपविजेता बन्दै सेमिफाइनलमा पुगेको छ । नेपालले यसअघि मलेसियालाई ५ विकेट, कतारलाई ३२ रन र हङकङलाई ८ विकेटले हराएको थियो ।

नेपालले शुक्रबार समूह बी को उप–विजेतासँग सेमीफाइनल खेल्नेछ । प्रतियोगिताको विजेताले टी–२० एसिया कप र शीर्ष तीन टोलीले एसीसी इमर्जिङ टिम्स एसिया कप खेल्न पाउनेछन् ।

समूहगत चरणको समाप्तिपछि नेपाल आठ अंकसहित पहिलो, हङ्कङ चार अंकसहित दोस्रो, कतार चार अंकसहित तेस्रो, साउदी अरेबिया दुई अंकसहित चौथो र मलेसिया दुई अंकसहित पाँचौँ भए । हङ्कङको नेट रनरेट –०.१२८ र कतारको नेट रनरेट –०.४५३ रह्यो ।