नेपालगन्ज २९ असार : नेपालगन्जमा धारिलो हतियार प्रहार गरि एक युवाको हत्या भएकोछ । गएराती नेपालगन्जको टाङ्गा स्टेशन नजिक दुई समुहबीच भएको झगडामा इरसद राई (कबाडिया)को हत्या भएको हो । 

नेपालगन्ज उपमहानगरपालिका वडा नम्बर–११ निवासी ३८ वर्षीय इरसद राई (कबाडिया) को शुक्रबार राती करीब १०ः३० बजेतिर हत्या भएको जिल्ला प्रहरी कार्यालय बाँकेले जनाएकोछ । 

दुई समुहबीच भएको झगडामा धारिलो हतियार प्रहारबाट गम्भीर घाईते भएका इरसदलाई उपचारका लागि भेरी अस्पताल लगिएको थियो । उनको भेरी अस्पतालमा उपचारका क्रममा मृत्यु भएको प्रहरीले बताएकोछ । 

जिल्ला प्रहरी कार्यालय बाँकेका प्रवक्ता एवम् प्रहरी नायव उपरीक्षक(डिएसपी) नारायण डाँगीले धारिलो हतियार प्रहार गरी एक समुहले राईको हत्या गरेको बताए । 

उनले भने ‘शुक्रबार रातीदेखि अहिलेसम्म शंकास्पद ५ जना युवालाई पक्रेर सोधपुछ गरिरहेका छौं ।’ हत्या गर्ने समुहको पहिचान नभएपनि उक्त समुहले प्रयोग गरेको मोटरसाईकल फेला परेको उनले बताए । 

प्रवक्ता डाँगीले भने, ‘हत्या गर्ने ब्यक्तिको पहिचान भएको छैन, ५ जना शंकास्पद युवालाई पक्राउ गरेकाछौं । घटनास्थल नजिकबाट हामीले एउटा मोटरसाईकल फेला पारेका छौं, सोही आधारबाट हामी हत्यारा पक्राउ गर्न नजिक पुगिसकेका छौं ।’ 

प्रहरीको प्रारम्भिक अनुसन्धानबाट लागु औषध दुब्र्यशनीकर्ताबीच आपसमा विवाद भएको थियो । विवाद मिलाउन खोजेका राईको नै हत्या भएको बताइएको छ ।