नेपालगन्ज २५ साउन : माध्यमिक शिक्षा परीक्षा (एसइई) को ग्रेड वृद्धि परीक्षामा चिट चोराउन खोज्ने दुई जना पक्राउ परेकाछन् ।

बाँकेको कोहलपुर नगरपालिकामा–१४ मा रहेको राम माविबाट चिट चोराउन खोज्ने दुई जनालाई पक्राउ गरिएको ईलाका प्रहरी कार्यालय कोहलपुरले जनाएकोछ ।

पक्राउ पर्नेमा कोहलपुर– ११ का साईमल कार्की र १२ का अर्जुन थारु रहेका छन् । माध्यामिक शिक्षा परीक्षा (एसईई) मा नियमित परीक्षार्थीको पुरक (ग्रेड बृद्धि) को परीक्षा २३ गतेबाट सञ्चालन भइरहेको छ ।

आज गणित विषयको परीक्षा थियो । गणित विषयको परीक्षा सञ्चालन भइरहेको बेला विद्यालयको पछाडीबाट चिट चोराउन खोज्नेलाई प्रहरीले पक्राउ गरेको राम माविका प्रअ तथा सुपरीटेन्डेन्ट जितेन्द्र यादवले जानकारी दिए ।

इलाका प्रहरी कार्यालय कोहलपुरका प्रमुख डिएसपी धर्मराज भण्डारीका अनुसार चिट चोराउन खोज्नेलाई नियन्त्रणमा लिईएको र उनीहरुलाई परीक्षाको सुपरीटेन्डेन्टले कारबाहीको लागि निवेदन दिएपछि कारबाही हुने जानकारी दिए ।