नेपालगन्ज २ भदौ : एयर एसियाले हप्तामा ४ दिन काठमाडौंबाट बैंकक उडान भर्ने भएको छ।

पाँच वर्षपछि काठमाडौंबाट उडान सुरु गर्न लागेको एयर एसियाले साताको ४ दिन (सोमबार, बुधबार, शुक्रबार र आईतबार) बैंककको डन मुइङमा उडान भर्ने भएको हो । उडान अक्टोबर २ देखि सुरु हुनेछ ।

एयर एसियाले काठमाडौंदेखि बैंकक उडानको टिकट दर ९ हजार ९९० रुपैयाँ कायम गरेको छ । यो मूल्य प्रोमोसनल अफर अन्तर्गत हो । यो अफर सन् २०२४ अक्टोबर २ देखि सन् २०२५ को मार्च २८ सम्म यात्रा गर्नेका लागि मात्र लागू हुनेछ । त्यसका लागि अगष्ट १२ देखि अगष्ट २५ सम्म टिकट बुक गरिसक्नुपर्नेछ ।

बैंकक नेपालीहरु यात्रा गर्ने मुख्य ‘डेस्टिनेसन’मा पर्ने भएकोले यो अफरले उनीहरुलाई आकर्षित गर्ने कम्पनीको विश्वास छ ।

यो प्रोमोसनल अफर एयरएसिया मुभ एप र एयर एसियाको पार्टनर युनिभर्सल टुर एण्ड ट्राभल्सबाट टिकट बुक गरेर प्राप्त गर्न सकिनेछ । यस्तै, नजिकैको एयर एसिया एजेन्सीमा गएर पनि टिकट बुक गर्न सकिन्छ ।

यो रुटमा साधारण टिकटको मूल्य हाल करिब २४ हजार रुपैयाँदेखि सुरु हुन्छ ।