नेपालगन्ज १७ असोज : जिल्ला प्रहरी कार्यालय बाँकेले जिल्लाको सुरक्षा व्यवस्था कडा बनाएकोछ । चाडबाड सुरक्षा योजना अनुरुपा जिल्लाको समग्र शान्ति, सुरक्षा, सद्भाव र अपराध नियन्त्रणका लागि सुरक्षा व्यवस्था कडा बनाएको हो । 

चाडपर्वमा हुनसक्ने सम्भावित आपराधिक घटना नियन्त्रण र सुरक्षाका लागि बाँके प्रहरीले तालिम प्राप्त कुकुरसहित एक हजार प्रहरी परिचालन गरेको हो । भयरहित वातवरणमा दशैँ, तिहार र छठ जस्ता ठूला पर्व मनाउन प्रहरीले बाँकेमा विशेष सुरक्षा योजनाअन्तर्गत तालिम प्राप्त कुकुरसहित प्रहरी परिचालन गरिएको जनाएको छ ।

दशैँ, तिहार र छठलगायत चाडपर्वमा हुनसक्ने विभिन्न आपराधिक घटना रोक्ने र शान्ति सुरक्षा कायम गर्ने लक्ष्यसहित बाँकेमा चाडपर्व विशेष सुरक्षा योजना लागू गरिएको जिल्ला प्रहरी कार्यालय प्रमुख प्रहरी उरीक्षक(एसपी) तुलबहादुर कार्कीले जानकारी दिए ।

‘चाडपर्वको समयमा अपराध र गैरकानूनी कार्य रोक्न विशेष सुरक्षा योजना तयार गरेर लागू गरेका छौँ, जिल्लाको सुरक्षा व्यवस्थालाई ध्यान राखेर थप एक हजार प्रहरी परिचालन गरिएका छन्’, उनले भने ।

विशेष सुरक्षा योजनाअन्तर्गत एकजना प्रहरीले दैनिक कम्तीमा १६ घण्टा ड्युटी गर्नुपर्नेछ । यसअघि दैनिक आठदेखि १२ घण्टासम्म ड्युटी गर्दै आइरहेका प्रहरीलाई १६ घण्टा ड्युटीमा खटाइने योजना बनाइएको हो । 

चाडपर्वको बेला १५ प्रकारका अपराध हुनसक्ने बाँके प्रहरीको आँकलन छ । बाँकेमा सबैभन्दा धेरै चोरीका घटना हुन्छन् । पाकेटमारी, ठगी, लुटपाट, स्न्याचिङ, कुटपिट, झैझगडा, गुण्डागर्दी, सवारीमा भाडा वृद्धि, कालोबजारी, खाद्य पदार्थको कृत्रिम अभाव, विस्फोटक पदार्थको अवैध कारोबार र घरेलु मदिराको प्रयोगबाट अपराधका घटना हुनसक्ने प्रहरीको विश्लेषण छ । 

यसैगरी जुवातास, सवारी दुर्घटना, ध्वनि प्रदूषण र सार्वजनिक यातायातमा हुनसक्ने महिला हिंसाका घटनालाई कम गर्नेगरी सुरक्षा योजना तयार गरिएको प्रहरी उपरीक्षक कार्कीले जानकारी दिए ।

उनका अनुसार नेपालगन्ज भन्सार, जमुनाहा नाका, नेपालगन्ज बसपार्क र कोहलपुर बसपार्कमा सहायता कक्ष स्थापना गरिएको छ । चाडपर्वमा सहरभन्दा गाउँघरमा मानिसको चहलपहल बढी हुने भएकाले गाउँमा समेत सुरक्षा व्यवस्थालाई चुस्त बनाइएको बाँके प्रहरीले बताएकोछ । 

विशेष सुरक्षा योजनाअन्तर्गत अपराध बढी घटेका स्थान र घट्न सक्ने सम्भावित स्थानमा सादा पोशाकमा पनि प्रहरी परिचालन, सूचना सङ्कलन तथा उच्च निगरानी सुरु गरिएको कार्कीले जानकारी दिए ।

समग्र जिल्लाको सद्भाव कायम राख्न बाँके प्रहरी अग्रसर रहेको बताउँदै दशैंका बेला चोक, वस्ती र टोलमा राखिने दुर्गाको मुर्ती स्थलको निगरानी, सामाजिक द्वेष भड्काउने, उछृङखल गतिविधि गर्नेहरुमाथि प्रहरीले निगरानी बढाएको बाँके प्रहरीले जनाएकोछ । 

उता ईलाका प्रहरी कार्यालय कोहलपुरले चाडपर्वका बेला लागुऔषध ओसारपसार बढ्ने आशङ्का भएकाले कोहलपुरमा तालिमप्राप्त कुकुर परिचालन गरेर जाँचमा तीव्रता दिइएको जनाएको छ । 

ईलाका प्रहरी कार्यालयका प्रमुख प्रहरी नायब उपरीक्षक धर्मराज भण्डारीले चाडपर्वका मानिसको भीड बढी हुनेहुँदा लागुऔषधको ओसारपसार बढ्ने आशङ्का रहेकाले यस्ता कार्य नियन्त्रणका लागि तालिमप्राप्त कुकुरसहितको टोली परिचालन गरिएको बताए ।