नेपालगन्ज : ढुङ्गा, गिट्टी तस्करीका नाइके मनोज केसी पक्राउ परेका छन् । राप्ती नदीबाट वर्षौदेखि ढुङ्गा, गिट्टी तस्करी गर्दै आइरहेका मनोजलाई बाँकेका प्रमुख जिल्ला अधिकारी राम बहादुर कुरुम्वाङ्गले पक्राउ गरेका हुन् ।

लामो समयदेखि टिप्पटर, जेसीभी राखेर कानूनको उल्लङ्घन गर्दै राप्ती नदी दोहन गर्दै आईरहेका मनोजलाई प्रजिअ कुरुम्वाङ्गले पक्राउ गर्न सफल भएका हुन् ।

प्रजिअ कुरुम्वाङ्गले कानूनलाई अटेर गरी डनगिरी देखाएर नदी दोहन गरेकाले मनोजलाई पक्राउ गरिएको सेतोखरीलाई जानकारी दिए । अब नदीजन्य पदार्थ तस्करी गर्ने चालक र ओसार पसार गर्ने उपकरण मात्र होईन मालिकलाई नै पक्राउ गरेपछि मात्र नियन्त्रण हुने भएकाले तस्कर मनोजलाई पक्राउ गरिएको प्रजिअ कुरुम्वाङ्गले बताए ।

पक्राउ परेका मनोज विरुद्ध जिल्ला प्रशासन कार्यालय बाँकेमा शुक्रबार नै मुद्दा दर्ता गरि कारबाही प्रक्रिया अगाडी बढाइएको छ । पक्राउ परेका मनोजलाई म्याद थप गरी अहिले थुनामा राखिएको छ ।

राप्ती नदीबाट ढुङ्गा, गिट्टी तस्करी गरिरहेका बेला केही दिनअघि चालक सहित टिप्पर र जेसिभीलाई सशस्त्र प्रहरीले पक्राउ गरेको थियो । चालक र साधन छुटाउन मनोजले मालिक हुँ भन्दै प्रहरीलाई बारम्बार दवाव दिइरहेपछि उनलाई पक्राउ गरि मुद्दा दर्ता गरिएको प्रजिअ कुरुम्वाङ्गले जानकारी दिए ।

‘कानूनलाई अटेर गर्ने, दादागिरी देखाउने, तस्करी गर्ने कोही पनि अब कानूनबाट बच्नेवाला छैन । एक–एक तस्करलाई पक्राउ गरी कानूनको दायरामा ल्याउनेछौं । अब गाडी र गाडी चालक मात्र होइन सिधै मालिकलाई पक्राउ गर्छौं ।’ प्रजिअ कुरुम्वाङ्गले भने । यहि असार १ गते देखि राप्ती नदीबाट नदीजन्य पदार्थ ओसारपसारमा प्रतिबन्ध लागिसकेको छ । कसैले ओसारपसार गरे कारबाहीको भागिदार बन्नु पर्छ ।