शुक्रबार, कात्तिक १४, २०७७   ०१:३७:०५

साग पदक विजेतालाई डुडुवाद्धारा नगदसहित सम्मान


सेतोखरी   2077-06-07

डुडुवा (बाँके) : १३ औं दक्षिण एसियाली खेलकुद सागमा रजत पदक प्राप्त गर्ने डुडुवा गाउँपालिकाका दुई जना खेलाडी र दुई जना कोचलाई नगद पुरस्कारसहित सम्मान गरिएको छ ।

२०७६ मंसिरमा नेपाल सरकार युवा तथा खेलकुद मन्त्रालयद्वारा आयोजित सागमा डुडुुवा गाउँपालिका वडा नम्बर ५ का शुसिला चन्द र निर्मला घर्तिमगरले रजत पदक प्राप्त गरेको र कोच खेलाडी पदम बहादुर बुढाथोकी र मुम्ताज अलीले खेलको माध्यमबाट गाउँपालिकाको नाम पहिचान गराएकोमा उनीहरुलाई सम्मान गरिएको हो ।

गाउँपालिकामा बुधबार एक कार्यक्रमको आयोजना गरि दुबै जना खेलाडीलाई दोसल्लासहित कदर पत्र र नगद रु जनही ५० हजारका दरले सम्मान गरिएको प्रमुख प्रशासकीय अधिकृत प्रशुराम उपाध्यायले बताए ।

चारै जना खेलाडीलाई गाउँपालिका अध्यक्ष नरेन्द्रकुमार चौधरीले नगदसहित सम्मान गरेका थिए । सम्मान गर्दै गाउँपालिका अध्यक्ष चौधरीले खेलकुदको माध्यमबाट राष्ट्रियस्तरमा नै गरिमा बढाएको र डुडुवाको नाम समेत उचो राखेको भन्दै खेलाडीको थप हौसला तथा उत्प्रेरणा जगाउन सम्मान गरेको बताए । उनले भने– ‘यो सम्मानले यहाँका थप स्थानीय खेलाडीहरुको उत्प्रेरणा बढाउनमा मद्दत गर्दछ ।’

कार्यक्रममा प्रमुख प्रशासकीय अधिकृत प्रशुराम उपाध्याय, शिक्षा तथा खेलकुद शाखा प्रमुख संजयकुमार कर्ण लगायतको सहभागिता रहेको थियो ।