कोहलपुर : बाँकेको कोहलपुरमा जारि ‘कोहलपुर ओपन क्रिकेट प्रतियोगिता’ अन्तर्गत तेश्रो दिन तीन वटा खेल सम्पन्न भएका छन् । बुधबार सम्पन्न खेलहरुमा युभीसीसी कोहलपुर, बिबिसीसी किर्तिपुर र यस एक्स्पर्ट क्वार्टरफाइनल प्रवेश गरेका छन् ।

कोहलपुर स्थित प्रस्तावित अन्तर्राष्ट्रिय क्रिकेट मैदानमा सम्पन्न भएको पहिलो खेलमा युभीसीसी कोहलपुरले नेपालगन्ज च्याम्पलाई ३४ रनले पराजित गर्यो । युभीसीसी कोहलपुरले दिएको ९२ रनको लक्ष्य पछ्याउने क्रममा नेपालगन्ज च्याम्पले १२.५ ओभरमा सबै विकेट गुमाएर ५७ रन मात्र बनाउन सक्यो ।

लक्ष्य पछ्याउने क्रममा नेपालगन्ज च्याम्पको लागि फर्दीन खानले १३ रन बनाउनु बाहेक अन्य ब्याट्सम्यानले दोहोरो अंकमा रन बनाउन सकेनन् । युभीसीसीको बलिंगमा आलोक चौधरी र सुमन गुरुङले समान ३ विकेट लय भने बिरेन्द्र शाही र गोपाल केसीले समान २ विकेट लिए ।

यस अघि टस हारेर ब्याटिंग गरेको युभीसीसीले निर्धारित १५ ओभरमा सबै विकेट गुमाएर ९१ रन बनाएको थियो । उसको लागि सुमन गुरुङले सर्वाधिक २७, कमल थापाले १८ तथा गोपाल केसीले १२ रन बनाए । नेपालगन्ज च्याम्पको बलिंगमा अनिमेष जंग शाहीले सर्वाधिक ४ विकेट तथा रबिश वर्मा र ऋतेश कार्कीले समान २ विकेट लिए ।
सो खेलमा प्लेयर अफ द म्याच युभीसीसी नेपालगन्जका सुमन गुरुङ चुनिए ।

यस्तै दोश्रो खेलमा बिबिसीसी किर्तिपुरले राँझा स्पोर्ट्स क्लबलाई ८ विकेटले पराजित गर्यो । राँझाले दिएको ६४ रनको लक्ष्य बिबिसीसीले ५.४ ओभरमा मात्र २ विकेट गुमाएर पुरा गर्यो ।

बिबिसीसीको लागि सन्दीप कुँवरले सर्वाधिक ३१ रन बनाए जुन क्रममा १० बलमा ५ छक्का हिर्काए । निरज सिंह धामीले १९ रन बनाए ।

यस अघि टस हारेर ब्याटिंग गरेको राँझाले १२.१ ओभरमा सबै विकेट गुमाएर ६३ रन बनाएको थियो । राँझाको लागि सद्दाम खानले ३६ रन बनाउनु बाहेक अन्य ब्याट्सम्यानले दोहोरो अंकमा रन बनाउन सकेनन् । बिबिसीसी किर्तिपुरका बलर निरज सिंह धामीले सर्वाधिक ४ विकेट तथा जनक बिस्टले २ विकेट लिए ।
यस खेलमा प्लेयर अफ द म्याच बिबिसीसी किर्तिपुरका निरज सिंह धामी चुनिए ।

यस्तै बुधबार भएको तेश्रो खेलमा यस एक्स्पर्ट्सले न्यू रोड–११ लाई १२६ रनले पराजित गर्यो । यस एक्स्पर्टले दिएको १९१ रनको लक्ष्य पछ्याउने क्रममा न्यू रोड– ११ ले निर्धारित १५ ओभरमा ९ विकेट गुमाएर ६४ रन मात्र बनाउन सक्यो । न्यू रोडका लागि महात्मा ओलीले सर्वाधिक १९ रन बनाए । यस एक्स्पर्टका बलर चित्र शर्माले ३ विकेट, नासिर अन्सारीले २ विकेट तथा सन्दीप खत्री र बिरेन्द्र नाथ योगीले समान १ विकेट लिए ।

यस अघि टस जितेर ब्याटिंग रोजेको एक्स्पर्ट्सले १५ ओभरमा ४ विकेट गुमाएर १९० रन बनाएको थियो । उसको लागि शुबेन्दु पाण्डेले शतक बनाउने क्रममा ५३ बलमा ११ चौका र ९ छक्का प्रहार गर्दै रन ११७ रन जोड्न सफल भए । बिमल सुनारले १९ तथा सुनिल खड्काले १८ रन बनाए ।

न्यू रोड–११ को बलिंगमा क्षितिज मल्लले २ तथा मदन शर्मा र किरन रावलले समान १ विकेट लिए ।

प्रतियोगिता अन्तर्गत बिहिबार क्वार्टरफाइनल चरणको खेलहरु हुनेछन् । पहिलो क्वार्टरफाइनलमा विहान ८ः३० बजे न्यू दर्पण युथ क्लब र कारकाँदो क्रिकेट क्लब, दोश्रो क्वार्टरफाइनलमा बिहान ११ः३० बजे च्याम्पियन्स स्पोर्ट्स क्लब र कोहलपुर क्रिकेट एकेडेमी तथा तेश्रो क्वार्टरफाइनलमा बिबि वारियर्स र युभीसीसी कोहलपुरले प्रतिस्पर्धा गर्नेछन् । चौथो क्वार्टरफाइनल खेल शुक्रबार विहान बिबिसीसी किर्तिपुर र सम्झना स्पोर्ट्स क्लब बीच खेलिनेछ ।