बर्दिया १० माघ : संसद विघटनपछि आगामी बैशाख १७ र २७ गते हुने निर्वाचनका लागि यतिबेला बर्दियामा तयारी कार्य अघि बढेकोछ । जिल्ला निर्वाचन कार्यालय बर्दियाले निर्वाचन सम्बन्धि गतिविधि अगाडी बढाएसंगै यतिबेला बर्दिया निर्वाचमा जुटेको हो ।

जिल्ला निर्वाचन कार्यालय बर्दियाका प्रमुख बुद्धिबहादुर खत्रीका अनुसार २०७४ सालमा भएको निर्वाचन भन्दा आगामी निर्वाचनमा करिब २३ हजार नयाँ मतदाता थपिएका छन् । २०७४ सालमा भएको संघीय निर्वाचनमा २ लाख ७२ हजार ४ सय ७७ मतदाता रहेकोमा मतदाता बृद्धि भइ यसपटक २ लाख ९५ हजार ५ सय ६ पुगेको हो । जम्मा मतदाता मध्ये केहि कम हुने निर्वाचन आयोगले जनाएकोछ । मृत्यु, बसाई सराई तथा नागरिकता त्याग गरेकाको नामावली हटाइने भएको हो ।

निर्वाचन घोषणा लगत्तै पुस ६ गतेदेखि नै फाटोसहितको मतदाता नामावली संकलन रोकेको निर्वाचन आयोगले माघ १५ गते मतदाता नामावली प्रकाशन गर्ने तयारीमा आफ्नो कार्यलाई तिब्रता दिएकोछ ।

निर्वाचन सम्बन्धि गतिविधिहरु जारी रहेको र निर्वाचनको तयारीका लागी सरोकारवालाहरुसंग छलफललाई तिव्रता दिएको छ । निर्वाचन आयोगले जिल्लाका विभिन्न राजनितिक दल तथा सम्बद्ध सरोकारवालाहरुसंग छलफल सम्पन्न गरिसकेकोछ ।

जिल्लामा माघ १५ गते देखि २१ गतेसम्म आठ वटै स्थानीय तहको कार्यालयमा दावि विरोधको समय राखिएको बताइएको छ । त्यो अवधिमा मतदाता नामावलीमा भएको नाम सच्याउने, नाम हटाउने, केन्द्र सच्याउने लगायतका काम हुने जिल्ला निर्वाचन कार्यालय बर्दियाका सूचना अधिकारी राजेशकुमार यादवले बताए ।

यस्तै जिल्लामा मतदान केन्द्र २८ वटा थप हुन सक्ने यादवले बताए । २०७४ सालमा भएको निर्वाचनमा बर्दिया जिल्लामा ३ सय २९ वटा मतदान केन्द्र रहेका थिए ।